Parıjde álimjettik qurbany bolǵan 14 jasar Alıshany eske alý marshy ótti
NUR-SULTAN. QazAqparat – Parıj mańyndaǵy Arjanteıde eki myńnan astam adam 14 jasar Alıshany eske alýǵa arnalǵan «aq marshqa» qatysty, dep habarlaıdy QazAqparat Euronews-ke silteme jasap.
8 naýryz kúni ony synyptastary soqqyǵa jyǵyp, Senaǵa ıterip jibergen soń, sýǵa batyp qaza tapty. Bul oqıǵaǵa deıin boıjetken qyzdyń synybyndaǵy qurby-qurdastary onyń dárejesin túsirip, aýyr sózder aıtqan, áleýmettik jelide jeke paraqshasyn buzyp ashý arqyly ıntımdik fotosýretterin qolǵa túsirip, jábir kórsetken.
Alıshanyń anasy: «Bul oqıǵanyń bolǵanyna sene alar emespin. Onyń qatygezdik, aıýandyqpen kóz jumǵanyn oılaǵanda, uıyqtaı almaımyn. Men ózimdi jalǵyz sezinip júrmin, júregimniń bir bólsheginen aıyrylǵandaı kúıdemin», - deıdi.
Tergeý málimetinshe, Alısha buryn jaqyn bolyp, keıin aralary sýyp ketken dostarynyń qolynan qaza tapqan. Mekteptegi teris áreketteri sebebimen lıtseıden ýaqytsha oqýdan shyǵarylǵan olar Alıshany adam kóp júrmeıtin jerge shaqyryp alyp, soqqyǵa jyǵyp, sýǵa ıterip jibergen. Ol kezde boıjetken áli esinen tanbaǵan edi.
Alıshanyń ólimine kináli ul bala men qyz qamaýǵa alyndy. Olarǵa adam óltirgeni úshin aıyp taǵyldy.
