Parıjde Álem chempıonatyna qatysyp jatqan dzıýdoshylardyń qorjyny ázirge bos
ALMATY. 25 tamyz. QazAqparat /Erlik Erjanuly/ - Frantsııanyń Parıj qalasynda dzıýdodan Álem chempıonaty ótip jatyr. 23-tamyzda bastalǵan bul dodada ázirge qazaqstandyqtardyń qorjyna birde-bir medal túspedi.
Álemniń 136 eliniń sportshylary qatysyp jatqan básekede alǵashqy kúni áıelder arasynda 48 kelidegi, al erler arasynda 60,66 kelidegi balýandar beldesken bolatyn. Onda 1-beldesýde Aleksandra Podrıadova (48 kg) men Eldos Smetovty 2009 jylǵy Álem chempıony japondyq Fýkýmı Tomoko men qola júldeger atanǵan armenııalyq Davtıan Hovganesý kesti. Erkebulan Qosaev (60 kg) amerıkandyq Nıkolas Kossordan basym túskenimen, 2010 jylǵy Álem chempıonatynyń kúmis júldegeri reseılik Arsen Galstıanǵa ese jiberdi. Azamat Mýqanov (66 kg) ta kanadalyq Mıchal Popıldi utqanymen reseılik Mýse Mogýshkovqa utyldy. Naýryzbek Maılashev bolsa úshinish kezdesýde jarys qojaıyny Davıd Larostyń osal tusyn taba almady. Keshe áıelder arasynda 52,57, erler arasynda 73 kelidegi dzıýdoshylardyń beldesýi boldy. Onda Kelbet Nurǵazına (52 kg) ekinshi kezdesýde 2009 jylǵy Álem chempıony japondyq Mısato Nakamýroǵa ese jiberdi. 57 kelidegi Alına Tendi jerebe alǵashqy kezdesýde-aq Mısato Nakamýronyń komandalastarymen jolyqtyryp, onda qarsylasynyń mereıi ústem shyqty. Dál osy salmaqta beldesken ekinshi balýan qyz Lenarııa Mıngazova bolsa Túrikmenstan men Japonııadan kelgen qarsylastarynyń osal tusyn tapqanmen, nemis qyzy Mırıam Popper aılasyn asyryp ketti. Al erler arasynda Rınat Ibragımov (73 kg) jartylaı fınalda frantsýz ıÝgo Legrandqa jol berip qoıdy. 28 tamyzǵa deıin jalǵasatyn bul dúbirli dodada búgin erler arasynda Islam Bozbaev pen Saıat Shamshıev (81 kg), áıelder arasynda Zarına Aldykova men Aıgerim Qydyrbaeva (63 kg) jarys jolyna shyǵady. Erteń Janar Janzýnova, Marıan Ýrdabaeva (70 kg), Ǵalııa Ulmentaeva, Zamzagúl Faızollanova (78 kg) jáne Tımýr Bolat, Aleksandr Kasachev (90 kg), arǵy kúni Gúljan Isanova, Zarına Abdrasılova (+ 78 kg) jáne Maksım Rakov (100 kg) pen Erjan Shynkeev (+ 100 kg) óz beldesýlerin ótkizedi.
