Parıjde 12 qabattan joǵary úıler salýǵa tyıym salyndy

PARIJ. QazAqparat – Parıjde 12 qabattan joǵary, ıaǵnı shamamen 37 metrden asatyn úılerdi salýǵa tyıym qaıta engizildi. Pıramıda formasynda salynyp jatqan Tour Triangle munarasynyń qurylysy kópshilik narazylyǵyn týdyrdy, dep habarlaıdy QazAqparat euronews.com-ge siltememen.

Iá, munda Eıfel munarasy bar, biraq, soǵan qaramastan, Parıj shaǵyn qabatty nysandardan turatyn qala bolyp qala bermek.

Maýsym aıynda Frantsııa astanasynda «Jergilikti ýrbanızatsııa jospary» (PLU) qabyldandy. Belsendilerdiń aıtýynsha, bul jospar ekologııanyń saqtalýyna yqpal etetin bolady.

Parıj qalalyq keńesi jańa ǵımarattardy 12 qabattan (37 metr) asyrmaý týraly shekteýdi qoldap, daýys bergennnen keıin PLU kúshine endi.

Parıjdiń iskerlik aýdany Defansta birneshe záýlim ǵımarattar, al 13 jáne 15-shi shaǵynaýdandarda klassıkalyq ǵımarattarǵa qaraǵanda bıikteý úıler bar. Biraq, qala ortalyǵyndaǵy nysandar bıik emes.

1973 jyly qurylysy aıaqtalǵan 209 metrlik Monparnas munarasyna qatysty halyq syn bildirdi. Keıin, 1977 jyly qala aýdandarynda 37 metrden joǵary úıler salýǵa tyıym salyndy. Bul shekteý 2010 jylǵa deıin qoldanysta boldy, sol jyldan bastap qalanyń burynǵy meri Bertran Delanoe Parıjde 180 metrlik keńseler jáne 50 metrlik turǵyn úıler salýǵa ruqsat etti.

Qazir salynǵan tyıym mer Ann Idalgonyń atmosferaǵa kómirqyshqyl gazyn shyǵarýdy azaıtý baǵdarlamasy aıasynda engizildi. Bul sheshimniń taǵy bir sebebi – daý týdyrǵan pıramıda tárizdi salynyp jatqan Tour Triangle munarasy. Qurylys 2021 jyly bastalyp, 2026 jyly aıaqtalýy tıis edi. Biraq, túrli zańdy turǵydaǵy jáne josparlaý barysyndaǵy daýlarǵa baılanysty qurylys 12 jylǵa shegerildi. Tour Triangle qurylysy aıaqtalsa, qaladaǵy bıiktigi boıynsha úshinshi ǵımarat bolmaq. Onda qonaqúı men keńseler, dúkender men dámhanalar bolady.