Parıj ulttyq operasynyń jaryq juldyzy Astanada sheberlik sabaǵyn ótkizdi
ASTANA. QazAqparat - Áıgili baletmeıster, Parıj ulttyq operasynyń jaryq juldyzy Sırıl Atanasov «Astana Opera» balettik trýppasyna sheberlik sabaq ótkizdi.
Maestro teatr trýppasymen 13 men 17 naýryz aralyǵynda jumys istedi, dep habarlady«Astana Opera» teatrynyń baspasóz qyzmeti.
Jarqyraǵan eńbek jolynda Sırıl Atanasov kóptegen kóne, klassıkalyq jáne zamanaýı qoıylymdardaǵy partııalardy oryndady. ıÝ. Grıgorovıch, K. Makmıllan, R. Nýreev, S. Lıfar, M. Fokın, B. Nıjınskıı jáne basqa da ataqty horeograftardyń tusaýkeserlik spektaklderine qatysty. R. Petı qoıylymyndaǵy M. Jarrdyń «Parıj Qudaı Anasynyń sobory» baletindegi Klod Frollonyń rólin alǵashqy bolyp somdaǵandardyń biri ekenin atap ótken jón.
S. Atanasovtyń Frantsııanyń balet ónerine qosqan úlesi eskerilip, memlekettik marapattardy ıelendi, ol - «Eren eńbegi úshin» Ulttyq ordeniniń, Óner jáne ádebıet ordeniniń kavaleri. Onyń daryndylyǵynyń taǵy bir qyry - jarqyn akterlik sheberligi, bul ártiske kınofılmderde komedııalyq jáne dramalyq beınelerdi somdaýǵa múmkindik berdi.
Bul Sırıl Atanasovtyń Qazaqstanǵa alǵashqy sapary boldy. Áıgili baletmeıster «Astana Opera» balet trýppasynyń kásibı sheberliginiń joǵary ekenin atap ótti.
- Klassıkalyq balet bul - kún ótken saıyn osy iske bar jan-tánimizdi salýdyń arqasynda barlyǵymyzdyń birlesken talpynysymyzdan týyndaıtyn sheksiz kórkem týyndy ǵana emes. Bul ártisterdiń kúndelikti zor eńbegi, óıtkeni álemniń kez kelgen trýppasy árbir qoıylymǵa daıyndalý úshin, birneshe aı jumys jasaıdy. Klassıkalyq spektaklge sahnaǵa shyǵý úshin, bıshige qajetti dene symbatyn saqtaýdyń ózi edáýir kúsh-jigerdi qajet etedi, - dep áńgimeledi Sırıl Atanasov.
Qazaqstandyq ártister, bul joly áıgili balet professorymen ótken kezekti sheberlik sabaǵy klassıkalyq baletke qajetti kishigirim tehnıkalyq elementterdi jańasha oryndaýǵa múmkindik bergenin atap ótti.
- Biz birneshe kún klassıkalyq bımen ózgeshe ádis boıynsha aınalystyq. Álemniń kez kelgen elinde negizgi balet pozıtsııalary birdeı bolǵanmen, frantsýzdyq mektepte jattyǵý sabaǵynda múldem basqa ádis - bı elementterin oryndaý kezektiligi jáne olardy oryndaý máneri qoldanylady. Onyń negizgi ereksheliginiń biri - óte tez jáne muqııat oryndaýdy qajet etetin sekirý, tandıý sııaqty kishigirim tehnıkalar men basqa qımyldardy jıi paıdalaný, - dep atap ótti ártister..
