Parıj turǵyndary elektrli samokatty jalǵa berý máselesin daýysqa salmaq

ASTANA. QazAqparat – 2 sáýir kúni Parıjde elektrli samokattardy jalǵa berý máselesine qatysty referendým ótedi, dep habarlaıdy QazAqparat Euronews-ke silteme jasap.

«Elektrli samokattardy erkin jalǵa berý qyzmetin jalǵastyrý qajet pe, joq pa?» Merııa qala turǵyndaryna osy suraqty qoıady.

Qazir Parıj kóshelerinde 15 myń shamasynda elektrli samokat bar. Mobıldi qosymsha arqyly jalǵa alyp, kez kelgen jerde qaldyryp kete berýge bolatyn bul qozǵalys quralyna qatysty pikir eki túrli. Turǵyndardyń biri bóligi olar trotýarlarda kóp oryn alady, jaıaý júretinder úshin qaýipti dep sanaıdy. Al, endi biri bul qorshaǵan ortany lastamaıtyn, Frantsııa astanasynda jyldam qozǵalýǵa múmkindik beretin qoǵamdyq kóliktiń balamasy ekenin alǵa tartady.

Parıj meri Ann Idalgo tyıym salýdy qoldaıtynyn, biraq sheshimdi turǵyndar qabyldaıtynyn málim etti.

Aıta ketsek, ótken jyly jergilikti polıtsııa osy qozǵalys quralyna qatysty 400 oqıǵany tirkegen, 459 adam zardap shegipti. Trotýarmen júrý, qozǵalys kezinde mobıldi telefon men qulaqqap paıdalanýǵa tyıym salynǵan. Keıbir aýdandarda jyldamdyqqa shekteý bar. Ereje buzǵandarǵa 1 500 eýroǵa deıin aıyppul qarastyrylǵan.

Almatyda da bul máseleniń ózekti ekeni jazylyp júr. Qala ákimi Erbolat Dosaev elektrosamokat, mopedterden týyndaıtyn máselelerdi sheshý týraly aıtqan edi.