Parıj túbindegi hımııa zaýyty órtendi
PARIJ. QazAqparat – Parıjden soltústik-batysqa qaraı ornalasqan Bezon kommýnasyndaǵy hımııa zaýytynda órt shyqty. Bılik qorshaǵan ortanyń lastanýyna alańdaýly, dep habarlaıdy QazAqparat France Bleu radıosyna silteme jasap.
Órt tutanǵan Protec Industrie kompanııasynyń zaýyty metaldardy óńdeýge mamandanǵan. Onyń kásiporynda adamǵa zııan zattardyń bar ekenin bildiretin Seveso eýropalyq jiktemesi bar.
«Topyraq pen ózendegi sýdyń lastaný qaýpi bar», - dedi kommýna meriniń orynbasary Nıkolıa Barne.
Sena ózeniniń jaǵasynda ornalasqan nysan ústinen qara tútin býdaqtap shyǵyp jatyr, alaıda jalyn sharpyǵan aýmaq kólemi anyqtalmaǵan. Órt sóndirýshiler tilsiz jaýmen kúresýde.
Barneniń aıtýynsha, bılik kásiporyn qyzmetkerleri men jaqyn jerdegi aýdandar turǵyndaryn evakýatsııalaý týraly sheshim qabyldaǵan.
Ázirge oqıǵa saldarynan zardap shekkender týraly aqparat túsken joq.
