Parıj tórindegi Paralımpıada: Dúbirli doda bastaldy
ASTANA. KAZINFORM – Frantsııa astanasy Parıj shaharynda XVII Paralımpıada oıyndary resmı túrde jalaýyn jelbiretti. 28 tamyz ben 8 qyrkúıek aralyǵynda 22 sporttan 549 medal jıyntyǵy sarapqa salynady. Bul rette, 167 delegatsııa qatarynda 4400 sportshy júldege talasady. Olardyń qatarynda 44 qazaqstandyq bar.
Dúbirli dodanyń shymyldyǵy Parıjdyń júregi sanalatyn áıgili Champs-Élysées býlvary men Place de la Concorde alańynda ashyldy. Bul oryndar Frantsııanyń tarıhy men mádenıetiniń sımvoly retinde asa tanymal. Sodan bolar, Paralımpıada oıyndaryna joldama alǵan sportshylar men bapkerlerdi, meımandardy qarsy alýǵa arnaıy tańdalǵan.
Paraolımpıada oıyndarynyń ashylýyna Frantsııa prezıdenti Emmanıýel Makron jáne halyqaralyq paralımpıada komıtetiniń prezıdenti Endrıý Parsons qatysty.
Sońǵy 7 jylda Paralımpıadany uıymdastyrýshylar qalalyq ortany ınklıýzıvti etý úshin Parıjge shamamen 125 mıllıon eýro ınvestıtsııalaǵan. Qazir kóshe qıylystarynda kórý qabileti buzylǵan adamdarǵa arnalǵan 10 400-ge jýyq akýstıkalyq júıe ornatylǵan.
2004 jyly Afınydan beri árbir Paralımpıada oıyndarynda medaldar sany boıynsha kósh bastap kele jatqan Qytaı bıyl 282 sportshysyna senim artyp otyr.
Brazılııa 255 sportshysymen ekinshi orynda tur. Jarysty qabyldaýshy el Frantsııa 237 sportshymen qatysady. AQSh quramynda 220, Ulybrıtanııa sapynda 201 sportshy bar.
Esterińizge salsaq, buǵan deıin Qazaqstan ulttyq quramasy kimderge senim artatynyn saraptap kórgen edik.
