Parıjde 10 kúnnen keıin bastalatyn Jazǵy Paralımpıadaǵa Qazaqstannan qansha sportshy qatysady

ASTANA. KAZINFORM – 2023 jyly sport jáne dene shynyqtyrýmen aınalysatyn erekshe qajettilikteri bar adamdar sany 56 822-ni qurady. Bul týraly búgin QR Týrızm jáne sport mınıstrliginiń baspasóz qyzmetinen málim boldy.

Mınıstrlik taratqan derekterge qaraǵanda, 10 kúnnen keıin Parıjde XVII Jazǵy Paralımpıada bastalady. Bul joly Qazaqstan quramasy rekordtyq joldamaǵa ıe boldy.

«Bizdiń qurama sporttyń 9 túrinen (parajúzý, para paýerlıftıng, para jeńil atletıka, para kanoede esý, para taekvondo, voleıboldy otyryp oınaý – erler, para atý,para ústel tennısi, para dzıýdo) 33 lıtsenzııa ıelendi. Jalpy 44 sportshy Parıjge barady. Aıta ketý kerek, kanoede esý (áıel), ústel tennısi jáne voleıboldy otyryp oınaýdan alǵash ret lıtsenzııa jeńip aldyq», - delingen habarlamada.

Sondaı-aq Astanada aldaǵy 8-13 qyrkúıekte osy jyldyń aıtýly oqıǵalarynyń biri – Dúnıejúzilik Kóshpendiler oıyndary ótedi. Dúbirli dodaǵa jalpy sany 100-ge jýyq memlekettiń delegatsııasy keledi. 2500 myńnan astam sportshy baq synaıdy. Búgingi tańda 89 el naqty qatysatynyn resmı túrde rastady. Kóshpendiler oıyndarynda ulttyq sporttyń 21 túrinen 97 medal jıyntyǵy sarapqa salynady.