Parıj teraktisi: Belgııa soty lańkesterdi 20 jylǵa bostandyǵynan aıyrdy
BRıÝSSELЬ. QazAqparat - 2015 jyldyń qarashasynda Parıjde bolǵan teraktini uıymdastyrýshylardyń ishinen jalǵyz ózi tiri qalǵan Salah Abdeslam dúısenbi kúni sottaldy. Ol Belgııa sotynyń sheshimimen polıtseılerdi óltirmek bolǵany úshin kináli dep tanyldy, dep habarlaıdy «QazAqparat» menshikti tilshisi.
Polıtsııamen atysqan S.Adeslam men onyń sybaılasy Sýfen Aıarı 20 jylǵa bas bostandyqtarynan aıyryldy, olardyń árqaısysyna 12 myń eýro kóleminde aıyppul salyndy.
Adeslamnyń ózi Belgııadaǵy sot protsesine qatysýdan bas tartqan. Qazir ol terrorıstik shabýyldarǵa qatysý qylmysy boıynsha negizgi aıyby boıynsha Frantsııa túrmesinde sot sheshimin kútip otyr. Onyń múddelerin Belgııanyń advokaty Sven Marı qorǵaıdy.
Esterińizge sala keteıik, Belgııadaǵy sot protsesi aqpan aıynda bastaldy. S. Abdeslam 2016 jyly naýryzda Brıýsselde tutqyndalǵan. Ol Parıjdegi terrorlyq shabýyldardan keıin polıtsııadan jasyrynyp júrgen bolatyn. Qolǵa túsirý barysynda S. Abdeslam sybaılastarymen birge qarýly qarsylyq kórsetip, polıtsııa qyzmetkerlerin jaralady.
Frantsııada ol 2015 jyldyń qarashasynda bolǵan terrorlyq shabýyl úshin taǵy bir sotty kútýde. Oqıǵa saldarynan 130 adam mert bolyp, 350-den astam adam zardap shekti. Belgııada taǵaıyndalǵan jazasyn ol Frantsııa túrmesindegi merzimi aıaqtalǵan soń óteıdi.
