Parıj soty Jerar Depardeni kináli dep tanydy
PARIJ. KAZINFORM — Frantsýz akteri Jerar Deparde 2021 jyly túsirilim alańynda eki áıelge seksýaldyq zorlyq jasaǵany úshin kináli dep tanyldy, dep habarlaıdy DW.
13 mamyr kúni Parıj soty 76 jastaǵy akterge 18 aı shartty jaza taǵaıyndady. Sot sonymen qatar onyń esimin seksýaldyq qylmys jasaǵandar tizimine engizip, psıholog emin qabyldaýǵa mindettedi. Úkim Depardeniń qatysýynsyz jarııalandy.
Akter úkimge shaǵym túsirmek
Prokýratýra naýryz aıynyń sońynda dál osyndaı jaza surap, 20 myń eýro aıyppul salýdy jáne jábirlenýshilerge ótemaqy tóleýdi talap etken. Sonymen birge ony eki jylǵa saılaýǵa túsý quqyǵynan aıyrýdy da suraǵan.
Úkim shyqqannan keıin Depardeniń advokaty sot sheshimine shaǵym túsiretinin málimdedi. Akter ózine taǵylǵan aıyptardy joqqa shyǵaryp otyr.
Bul — Depardege qatysty alǵashqy sot úkimi
Sot protsesi 24 naýryzda bastalǵan. Akterdiń advokaty Jeremı Assý aıyptaýlardy jalǵan dep atap, Depardeniń júregine ota jasalǵanyn jáne onyń qant dıabetimen aýyratynyn aıtqan.
Sot taǵaıyndaǵan medıtsınalyq sarapshy akterdiń sotqa qatysýyna densaýlyǵy jaramdy ekenin rastady, biraq tyńdaýlar 6 saǵattan aspaýy, ár 15 mınýt saıyn úzilis jáne túski as qarastyrylýy kerek ekenin aıtqan.
Іs 2021 jyly túsirilgen «Jasyl japqyshtar» fılmi kezinde bolǵan jaǵdaıǵa baılanysty qozǵalǵan. 54 jastaǵy dekorator men 34 jastaǵy rejısserdiń kómekshisi Depardeni orynsyz sózder aıtyp, olarǵa tıisken dep aıyptady. Akterdiń áıelderdiń keýdesi men dene múshelerine ruqsatsyz qol tıgizgeni aıtyldy.
Olar 2024 jyldyń basynda akterge qarsy sotqa shaǵym túsirgen.
Jerar Deparde 200-den astam fılmge túsken. Oǵan qatysty seksýaldyq zorlyq kórsetý týraly birneshe ret aıyp taǵylǵan. 2023 jyldyń sáýirinde taǵy 13 áıel — aktrısalar, massovkada oınaǵandar men grımerler — onyń orynsyz qylyqtary týraly málimdegen. Alaıda sotqa jetken alǵashqy is — osy.
Aıta keteıik, buǵan deıin Parıjde Jerar Depardege qatysty sot isi jalǵasyp jatqanyn jazdyq.