Parıj sán aptalyǵynda Baıqońyrǵa arnalǵan kıimder toptamasy tanystyrylady
ASTANA. QazAqparat - 24-25 qańtar kúnderi Parıj qalasynda "Oriental Fashion Week" sán aptalyǵy ótedi. Oǵan alǵash ret qazaqstandyq dızaınerler qatysqaly otyr, dep habarlaıdy QazAqparat tilshisi.
Otandyq dızaınerler usynatyn toptamalardyń biri "Baıqońyr" ǵarysh aılaǵyna arnalmaq.
"Qazaqstandyq dızaınerler túrli halyqaralyq kórsetilimderge qatysady jáne barlyq jerde olardy jyly qabyldaıdy. Munyń sebebi - kıimderde ulttyq erekshelikterimizdiń kórinis tabýynda. Men ózimniń alǵashqy kollektsııamdy qazaq jáne orys mádenıetin sabaqtastyrǵan ánshi Roza Baǵlanovanyń 95 jyldyǵyna arnadym. Onda zamanaýı svıtshot, fýtbolkalarǵa prınt basý arqyly Roza Baǵlanova syndy uly ánshiniń bolǵanyn eske saldyq. Al Baıqońyr - álemdegi alǵashqy jáne úlken ǵarysh aılaǵy. Qazaqstannyń qalalaryn bilmese de, sheteldikter Baıqońyrdy jaqsy biledi. Gagarındi tanymaıtyn adam joq. Sondyqtan, ulttyq maqtanyshymyzdy álemge sán arqyly tanytýdy uıǵardyq", - deıdi bıznesvýmen, feshn-prodıýser "DS" brendiniń negizin qalaýshy Dınara Sátjan.
"DS" brendiniń kreatıvti dırektory Baýyrjan Saǵıevtiń aıtýynsha, ótken ǵasyrdyń 60-jyldary saltanat qurǵan ǵarysh dáýiriniń rýhyn kórsetý úshin "Baıqońyr" toptamasyn ázirleýde arnaıy materıaldar, jańa tehnologııalar, jańa tigin ádisteri qoldanylady.
Sonymen birge, "Oriental Fashion Week" sán aptalyǵyna qazaqstandyq taǵy úsh dızaıner - Aıda Kaýmenova, "Bıbisara" qazaq brendiniń negizin qalaýshy Ásem Altynbekova jáne sándi keshki kóılekterimen tanylǵan Naıl Baıkúshikov qatysady. Olardyń kórsetilimderi qazaqtyń halyq ánderimen súıemeldenetin bolady.
