Parıj Paralımpıadasy kezinde 25 myń polıtsııa qyzmetkeri qaýipsizdikti qamtamasyz etedi

ASTANA. KAZINFORM - Frantsııanyń Іshki ister mınıstri Jerald Darmanen Paralımpıada oıyndary kezindegi qaýipsizdik sharalary aıasynda Parıjde jáne odan tys jerlerde kún saıyn 25 myńǵa jýyq polıtsııa qyzmetkeri kezekshilik etetinin málimdedi.

Paralımpıada oıyndary 28 tamyz ben 8 qyrkúıek aralyǵynda Frantsııa astanasynda ótedi.

Baspasóz máslıhatynda sóılegen sózinde Іshki ister mınıstri Jerald Darmanen bılik Paralımpıada oıyndary qarsańynda eshqandaı terrorıstik qaýipti baıqamaǵanyn aıtty. Ol Gazadaǵy soǵys pen Taıaý Shyǵystaǵy aımaqtyq qaqtyǵysqa baılanysty 27 sportshydan turatyn Izraıl delegatsııasyn polıtsııa táýligine 24 saǵat kúzetetinin atap ótti.

«Konkord stadıonyndaǵy ashylý saltanatyna 30 myńǵa jýyq kórermen jınalyp, Elıseı alańynda ótetin saltanatty sharaǵa taǵy 15 myńǵa jýyq adam tegin qatysa alady», - dedi J.Darmanın.

Polıtsııa sondaı-aq jeksenbi kúni Paralımpıada oıyndarynyń otany sanalatyn Londonnyń soltústik-batysyndaǵy Stok Mandevıll aýylynan Frantsııaǵa kelgen Olımpıada alaýy estafetasynyń qaýipsizdigin qamtamasyz etýmen aınalysty.

Uıymdastyrý komıtetiniń prezıdenti T. Estanget búginde qol jetimdi 2,8 mıllıon bılettiń 1,7 mıllıony satylyp ketkenin aıtty.

Esterińizge sala keteıik, Paralımpıada oıyndary Parıjde 28 tamyz ben 8 qyrkúıek aralyǵynda ótedi. Qazaqstan quramasynyń qorjynynda 33 lıtsenzııa bar. Toǵyz sport túrinen (júzý, parapaýerlıftıng, jeńil atletıka, parakanoe, paratekvondo, voleıbol — erler, oq atý, ústel tennısi, dzıýdo) 44 sportshy baq synaıdy.