Parıj ortalyǵynda tártipsizdikter oryn aldy
ASTANA. QazAqparat - Parıj ortalyǵyndaǵy Bastılııa alańynda tártipsizdikter bastaldy.
Polıtsııa qorshaýlardy buza bastaǵan narazylyq bildirýshilerge qarsy tútin shashkalaryn paıdalandy. Manıfestanttardy tarqatý maqsatynda polıtsııa qyzmetkerleri arnaıy quraldardy paıdalandy. Bir adam jaraqat aldy, dep jazady «RIA Novostı» agenttigi.
Lenta.rý-dyń habarlaýynsha, birshama ýaqyt ótkennen keıin birshama tynyshtyq ornady. Polıtseıler narazylyq bildirýshilerdiń eń kóp tobyn qorshaýǵa aldy.
Saılaýǵa qarsy osyǵan uqsas mıtıng senbi, 22 sáýir kúni ótken bolatyn. Ol kezde 2 myńǵa jýyq adam jınalǵan edi. Tártip saqshylary olardy kóz jasaýratatyn gazdy qoldaný arqyly tarqatty.
Jeksenbi kúni Frantsııada prezıdent saılaýynyń alǵashqy kezeńi ótti. Bıýlletenderdiń 30 paıyzy eseptelip, onyń nátıjesi boıynsha, ekinshi kezeńge 24,78 paıyz daýyspen «Ulttyq fronttyń» kóshbasshysy Marın Le Pen jáne 21,75 daýys jınaǵan «Alǵa» qozǵalysynyń kóshbasshysy Emmanýel Makron ótti. «Respýblıkalyqtar» ońshyl qozǵalysynyń ókili Fransýa Fııon 19,65 paıyz daýys jınady.
Foto: Julien Mattia / Zumapress / Globallookpress.com
