Parıj Olımpıadasynyń jabylý saltanaty ótti
PARIJ. KAZINFORM - Frantsııa astanasy Parıj qalasynda ótken Jazǵy Olımpıada máresine jetti. Dál qazir saltanatty jabylý rásimi aıaqtaldy. Halyqaralyq Olımpıada komıtetiniń (HOK) prezıdenti Tomas Bah 2024 jyly Parıjde ótken Olımpıada oıyndaryn jabyq dep jarııalady.
Sodan keıin Olımpıada alaýy sóndirildi.
«Dástúrge sáıkes, men búkil álem jastaryn tórt jyldan keıin Amerıka Qurama Shtattarynyń Los-Andjeles qalasynda jınalyp, bizben birge HHHIV Olımpıada oıyndaryn atap ótýge shaqyramyn», - dedi Tomas Bah.
Bul shara halyqaralyq shoý juldyzdarynyń án shashýymen bastaldy. «Stad de Frans» stadıony úlken teatrǵa aınaldy. Shoý áýede altyn kostıým kıgen adamnyń shatyrdan túsýimen bastaldy, sodan keıin oǵan Olımpıada oıyndarynyń otany Grekııanyń týy tabystaldy.
Áıelder arasyndaǵy marafon jeńimpazdary 2024 jylǵy Olımpıada oıyndarynyń jabylý saltanatynda marapattaldy. Parıj Olımpıadasynda Qazaqstan quramasy 1 altyn, 3 kúmis, 3 qola medalǵa qol jetkizdi.
Qazaqstandyq sportshylar Olımpıada oıyndarynda sporttyń 25 túrinen synǵa tústi. Elimizdiń atynan 80 sportshy 92 joldama jeńip alǵan bolatyn. Qazaqstandyq sportshylar boks, dzıýdo, sporttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennısten synǵa tústi.
Sondaı-aq olar veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten jarys jolyna shyqty.
Altyn júldeni Olımpıadanyń alǵashqy kúni el qorjynyna dzıýdodan Eldos Smetov (60 keli) saldy. Qazaqstandyq balýan osylaısha el quramasynan Olımpıadada úsh márte medal alǵan sportshy boldy. Ol 2016 jyly Rıo Olımpıadasynda kúmiske qol jetkizse, 2020 jyly Tokıo Olımpıadasynda qola aldy.
Al kúmis júldeni sporttyq gımnastıkadan Narıman Qurbanov, grek-rım kúresinen Demeý Jadyaev (77 keli) jáne bokstan Nurbek Oralbaı (80 keli) qorjynǵa saldy.
Sondaı-aq nysana kózdeýden komandalyq jarysta Islam Satpaev pen Aleksandra Le (tapanshamen 10 metrden atý), dzıýdodan Ǵusman Qyrǵyzbaev (66 keli) jáne áıelder boksynan Nazym Qyzaıbaı (51 keli) qola medal jeńip aldy.
Qazaqstandyq sportshylar Jazǵy Olımpıada oıyndaryna 1996 jyldan beri táýelsiz memleket quramasy sapynda qatysýǵa múmkindik aldy. Sodan bergi ýaqytta olar barlyǵy 78 medal alyp qaıtty. Onyń ishinde 26-y bylǵary qolǵap sheberleriniń enshisine tıedi. Qazaqstandyq boksshylar 7 altyn, 8 kúmis, 11 qola medal aldy.
Saltanatty shara Olımpıada alaýyn 2028 jyly kelesi oıyndardy qabyldaıtyn Los-Andjeles (AQSh) qalasynyń merine tapsyrýmen aıaqtaldy.
