Parıj Olımpıadasynyń bıletteri jappaı satyla bastady
ASTANA. KAZINFORM – 2024 jyly Parıjde ótetin Olımpıada oıyndarynyń uıymdastyrý komıteti sporttyq is-sharalarǵa bıletterdiń jappaı satylymy bastalǵanyn jarııalady.
QR Ulttyq olımpıadalyq komıtet atap ótkendeı, aktsııa keshe, 17 sáýirde bastalǵan. Uıymdastyrýshylar bılet satyp alyp úlgermegen jankúıerlerge syılyq jasap, Olımpıadanyń bastalýyna 100 kún qalýyn atap ótýdi jón kórgen.
Osyǵan deıin birqatar sport túrlerinde bılet satylymy toqtatylǵan edi. Alaıda ótken kúnnen beri qaraı aktsııa arqyly týrıster men jankúıerlerge olımpıadalyq jarystardy kórýge sońǵy múmkindik berilip otyr. Ol úshin barlyq sport túrlerine, sonyń ishinde oryndar tolyq satylyp ketken jarystarǵa 250 myń bılet satylymǵa shyǵarylǵan.
Bıletterdiń eń tómengi baǵasy – 24 eýro. Uıymdastyrýshylar mundaı bıletterdiń 20 myń danasyn usynyp otyr. Qalǵandarynyń quny sport túrine baılanysty bolady jáne shamamen 1000 eýroǵa deıin barady.
Olardy áli de ınternet arqyly tek resmı bılet platformasynan satyp alýǵa bolady. Qonaqjaılyq paketteri de bar, onda bılettermen birge turǵyn úı usynylady. Jankúıerler deńgeıine baılanysty kez kelgen ornalasatyn jerdi tańdaı alady, ártúrli ekskýrsııalar men ınteraktıvterge jazylý múmkindigi de bar.
Mundaı paketterdi satyp alǵandar úshin Clubhouse24 qoljetimdi bolady. Bul – Olımpıada ótetin orynnyń ártúrli bóliginde ornalasqan 200 arnaıy alań. Jankúıerlerge Frantsııa taǵamdarymen tanysý, sportshylar men ártisterdiń ónerin tamashalaý, jarystardy kórý jáne t.b. usynylady.
Týrıster Parıj tynysymen tanysýy úshin sanattar boıynsha arnaıy paketter jınaǵy daıyndalǵan: tarıh jáne mádenıet, tamaq pen sharap, sán jáne stıl, zamanaýı Parıj, otbasylyq, belsendi jáne saýyqtyrý demalysy.
Qonaqjaılyq paketterin On Location platformasy arqyly satyp alýǵa bolady, ol úsh-bes juldyzdy reıtıngi bar birqatar qonaqúılermen jáne toptarmen jumys isteıdi. Onyń ishinde oıyndardy uıymdastyrý komıtetiniń seriktesi Accor da bar. Aıta keterligi, jıyntyqqa áýe bıletteriniń quny kirmeıdi.
Olımpıada jáne Paralımpıada oıyndaryna bıletterdiń jalpy sany 13 mıllıonnan asady.
Esterińizge sala keteıik, 2024 jylǵy Olımpıada oıyndarynda sporttyń 32 sport túrinen 329 medal óz ıesin tabatyn bolady. Qazirge deıin Qazaqstan sportshylary Olımpıada oıyndaryna 33 joldama jeńip aldy. Tórtjyldyq dodanyń alaýy 26 shilde kúni tutanyp, 11 tamyz kúni máresine jetedi.
