Parıj Olımpıadasynyń bastalýyna týra 100 kún qaldy

ASTANA. KAZINFORM – Búgin Frantsııa tórinde alaýy tutanatyn XXXIII jazǵy Olımpıada oıyndarynyń bastalýyna týra 100 kún qaldy. Tórtkil dúnıe kóz tikken tórtjyldyq doda osy jyldyń 26 shildesi men 11 tamyzy aralyǵynda ótedi.

Osyǵan oraı búgin elordadaǵy «Astana» trıatlon saıabaǵynda «Olımpıada oıyndaryna 100 kún» atty 5 shaqyrym qashyqtyqta qala turǵyndary arasynda buqaralyq júgirý sharasy ótpek. 

Aıtýly sharaǵa 5 shaqyrym qashyqtyqty baǵyndyra alatyn barlyq qala turǵyndary men qonaqtary shaqyrylady. Jas shekteýi joq. 

Uıymdastyrýshylardyń aıtýynsha aıtýly buqaralyq júgirý sharasy Olımpıadalyq qozǵalysty nasıhattaý ári olımpıadashalarymyz ben olımpıadalyq lıtsenzııalardy alýǵa úmitkerlerimizdi qoldaý maqsatynda ótpek. 

«Mańyzdy oqıǵaǵa deıin, XXXIII jazǵy Olımpıada oıyndarynyń bastalýyna aǵymdaǵy jyldyń 17 sáýirinde 100 kún qalady. Soǵan oraı Astana qalasy ákimdiginiń qoldaýymen qala turǵyndary qatysa alatyn buqaralyq sharasyn ótkizemiz. Aıtýly shara bul jarys emestigin aıta ketkim keledi. Bul buqaralyq júgirý. Oǵan barlyq turǵyndar qatysa alady»- deıdi Astana qalasy ákimdiginiń Sporttyq buqaralyq is-sharalardy ótkizý dırektsııasynyń basshysy Bahtııar Masanov. 

Tirkelý kezinde qatysýshylarǵa lotereıa bıletteri taratylyp baǵaly syılyqtar oınatylady. 
Sondaı-aq, búgin osy shara aıasynda qol kúres (armrestlıng), arqan tartys pen gir sportynan jarystar ótedi.

Esterińizge sala keteıik, qazirgi tańda Qazaqstan sportshylary Parıj olımpıadasyna 32 joldama jeńip aldy. 

Naqtyraq aıtsaq, osyǵan deıin Qazaqstan quramasy bokstan (erler) – 6, nysana kózdeý – 5, sadaq atý – 4, semserlesý – 4, tas joldaǵy velosport – 3, qazirgi bessaıys – 2, taekvondo – 2, boks (áıelder) – 1, grek-rım kúresi – 1, erkin kúres – 1, sporttyq gımnastıkadan – 1, batýttaǵy gımnastıka – 1, jeńil atletıkadan 1 joldama jeńip aldy.

Jalpy Parıjdegi Olımpıada oıyndarynda 32 sport túrinen 329 medal jıyntyǵy sarapqa salynady.