Parıj Olımpıadasynda ózge eldiń namysyn qorǵaıtyn qazaq sportshylaryn bilesiz be
ASTANA. KAZINFORM - Frantsııa astanasy Parıj qalasynda ótetin XXXIII jazǵy Olımpıada oıyndarynyń bastalýyna sanaýly kúnder qaldy. Osy oraıda tórt jylda bir alaýy tutanatyn baıraqty básekede ózge eldiń atynan synǵa túsetin qazaq sportshylary týraly da jaza ketkendi jón kórdik.
Qizirgi qolymyzda bar málimetter boıynsha shetelde turatyn tórt qandasymyz Parıj Olımpıadasynda synǵa túspek. Onyń ishinde ekeýi qytaıda turatyn qandasymyz bolsa, ekeýi Ózbekstan týy astynda básekelesedi.
Bıyl qytaıda turatyn qandastarymyzdan Parıj Olımpıadasyna eki birdeı sportshy joldama jeńip aldy.
Onyń biri dańyqty boksshy álem chempıonatynyń kúmis júldegeri, Azııa oıyndarynyń chempıony boksshy – Toqtarbek Tańatqan. Al ekinshisi erkin kúresten Azııa chempıonatynyń, Azııa oıyndarynyń júldegeri - Kabıran Abýshaımanuly.
Toqtarbek Tańatqan qytaıdyń qazaqstar eń kóp qonystanǵan Altaı aımaǵynda 1996 jyly dúnıege kelgen. Bala kúninen bokspen aınalysyp, búgingi tańda bokstan qytaı ulttyq quramasyndaǵy eń úzdik boksshylardyń biri.
Parıj - Toqtarbektiń qatysqaly otyrǵan ekinshi Olımpıadasy. Ol osyǵan deıin Tokıo Olımpıadasynda da baq synaǵan bolatyn. Ol álem chempıonatynyń kúmis júldegeri, Qytaıdyń tórt dúrkin chempıony. Qandasymyz 2023 jyly Azııa oıyndarynda jeńimpaz atanyp, Parıj Olımpıadasyna joldama jeńip alǵan bolatyn. Endi Parıj Olımpıadasynda 80 keli salmaqta Qytaı eliniń namysyn qorǵaıdy.
Aıta keteıik, qytaılyq qazaq boksshysy Parıj Olımpıadasynda otandasymyz Nurbek Oralbaımen joly túıisip qalýy múmkin ekenin jazǵan bolatynbyz.
Atalǵan qos boksshy 2023 jyly Tashkentte ótken álem birinshiliginiń fınalynda joldary túıisip, otandasymyz jeńimpaz atansa, ekinshi ret Hanchjoýdaǵy Azııa oıyndarynda Toqtarbek ese qaıtaryp, chempıondyq ataqpen birge Olımpıada joldamasyn jeńip alǵan edi.
Ekinshi qytaılyq sportshy, erkin kúres sheberi Kabıran Abýshaımanuly 1998 jyly Qytaıdaǵy Tarbaǵataı aımaǵy Dórbljin aýdanynda dúnıege kelgen. Ol – Azııa chempıonatynyń, Azııa oıyndarynyń júldegeri. Qandasymyz Olımpıada joldamasyn osyǵan deıin atap ótkenimizdeı, Stambulda (Túrkııa) ótken sońǵy álemdik lıtsenzııalyq týrnırde jeńip aldy.
Endi ol Parıj Olımpıadasyna 97 keli salmaq dárejesinde synǵa túsedi. Ol osyǵan deıin Jazǵy Azııa oıyndarynda qola medal jeńip alsa, Azııa chempıonatynda kúmis júldege qol jetkizgen.
Osy oraıda aıta keteıik, Qytaı quramasy kúres túrlerinen Parıj olımpıadasyna jalpy 11 joldama jeńip alǵan.
Úshinshi sportshymyz Ózbekstanǵa tarıhı joldama syılaǵan - Aqteńge Keýnimjaeva.
Ol 1999 jyly Ózbekstan quramyndaǵy Qaraqalpaqstan Respýblıkasynyń astanasy Nókis qalasynda dúnıege kelgen. Aqteńge – 23 jasqa deıingi balýandar arasynda Azııa chempıony, qurlyq birinshilikteriniń júldegeri, Azııa oıyndarynyń qola medal ıegeri, Ózbekstannyń eńbek sińirgen sport sheberi.
Ol sáýirde Bishkekte ótken kúres túrlerinen Azııa qurlyǵynyń irikteý týrnırinde 50 keli salmaqta Parıj Olımpıadasynyń joldamasyn jeńip aldy. Osylaısha, Ózbekstan tarıhynda áıelder kúre¬si¬nen joldama ıelengen alǵashqy sportshy atandy.
Aıta keteıik, bıyl áıelder kúresinen Qazaqstan ulttyq qurmasy Olımpıadaǵa birde-bir joldama ıelene alǵan joq.
Parıjde baq synaıtyn tórtinshi qazaq sportshysy - Rýslan Abdýllaev. Ol bokstan Ózbekstan ulttyq quramasynyń múshesi. Abdýllaev 2002 jyly Ózbekstanda týǵan. Ol 2023 álem chempıony atansa, 2022 jyly Azııa chempıony, al 2021 jyly Ózbekstan chempıony atanǵan. Abdýllaev naýryzda Italııada ótken álemdik lıtsenzııalyq týrnırdiń shırek fınalynda serbııalyq Alekseı Sendrıkti utyp, Olımpıada lıtsenzııasyn enshiledi. Ol Parıjde 63,5 keli salmaqta synǵa túsedi.
Aıta keteıik, Parıj Olımpıadasynda bokstan Qazaqstannyń erler quramasy da, Ózbekstannyń erler quramasy da tolyq quramda synǵa túsedi.
Esterińizge sala keteıik, qazirgi tańda tórtjyldyq dodaǵa joldama jeńip alǵan qazaqstandyq sportshylarymyz sońǵy oqý-jattyǵý jıyndaryn ótkizip jatyr.
Qazaqstan quramasy Olımpıada oıyndaryna sporttyń 25 túrinen 80 joldama jeńip aldy. Naqtyraq aıtsaq, boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.
Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.
