Parıj Olımpıadasynda medal alǵan qazaqstandyq boksshylarǵa beriletin syıaqy mólsheri belgilendi

ASTANA. KAZINFORM - Qazaqstan boks federatsııasy Parıj Olımpıadasyna joldama alǵan boksshylar men olardyń jattyqtyrýshylaryna arnap aýyzashar uıymdastyrdy.

Qazaqstan boks federatsııasynan málim etkenindeı, jıynda jaqynda Italııada ótken álemdik irikteý týrnırinde lıtsenzııa jeńip alǵan boksshylar men ulttyq quramanyń bapkerler alqasy qarjylaı syılyqtarmen marapattaldy.

Boksshylarǵa 20 myń AQSh dollarynan tabystalsa, bas bapker Myrzaǵalı Aıtjanovqa 10 myń dollar berildi. Budan bólek, ulttyq quramanyń jattyqtyrýshylary da syıaqyǵa ıe boldy.

Sonymen qatar Parıj Olımpıadasynda joǵary nátıje kórsetken boksshylarǵa Qazaqstan boks federatsııasy tarapynan beriletin syıaqy mólsheri jarııalandy:

1-oryn: 220 000 $

2-oryn: 120 000 $

3-oryn: 70 000 $

4-oryn: 30 000 $

5-oryn: 10 000 $.

Al bas bapker men jattyqtyrýshylar alqasy oryn alǵan boksshy syıaqysynyń 30 paıyzyna para-par qarjylaı syıaqy alady.