Parıj Olımpıadasyna upaı beretin sońǵy báseke Astanada ótedi
ASTANA. KAZINFORM – Elorda 10-12 mamyr kúnderi dzıýdodan Parıj olımpıadasyna qatysýǵa upaı beretin sońǵy Qazaqstan Barysy Grand Slam týrnıri ótedi.
QR Dzıýdo federatsııasy málim etkendeı, atalǵan mańyzdy doda 10-12 mamyr kúnderi Astanadaǵy Jaqsylyq Úshkempirov atyndaǵy jekpe-jek saraıynda ótedi.
Baıraqty doda dzıýdoshylar úshin 2024 jyly Parıjde ótetin Jazǵy Olımpıada oıyndaryna upaı beretin sońǵy Grand Slam kezeńi bolmaq.
Esterińizge sala ketsek, bul dodanyń nátıjesinde IJF erejelerine sáıkes jarystyń jeńimpazdary men júldegerleri arasynda Álemdik jáne olımpıadalyq reıtıngterde upaılar bólinedi.
Atap aıtqanda, І oryn úshin 1000, ІІ oryn úshin – 700, al ІІІ oryn úshin – 500 upaı esepteletin bolady.
Qazaqstan dzıýdo federatsııasy men Halyqaralyq dzıýdo federatsııasynyń (IJF) ekijaqty kelisimshartyna sáıkes, Qazaqstan álemdik Grand Slam jarysyn 2026 jylǵa deıin qabyldaıdy.
