Parıj Olımpıadasyna irikteý: Nazym Qyzaıbaı joldamaǵa jaqyndaı tústi

ASTANA. KAZINFORM - Taıland astanasy Bangkok qalasynda ótip jatqan bokstan Olımpıadaǵa irikteý týrnırinde Nazym Qyzaıbaı (50 keli) shırek fınalǵa shyqty. 

50 keli salmaq dárejesinle baq synaǵan qazaqstandyq boksshy 1/8 fınalda ulybrıtanııalyq Savanna Stýbleıdi jeńdi. 

Jekpe-jek barysynda Nazym bir bas joǵary boldy. Qarsylasyna kóbirek soqqy jumsady. Nátıjesinde tóreshiler biraýyzdan Nazymdy bul kezdesýdiń jeńimpazy dep tanydy. Osylaısha qarsylasynan 5:0 esebimen basym túsken ol shırek fınalǵa joldama aldy.

Endi el quramasynan 18:45-te Muhammedsabyr Bazarbaıuly (63.5 keli) besinshi joldama úshin kolýmbııalyq Hose Manýel Vıafaramen qolǵap túıistiredi. 

Sondaı-aq búgin Valentına Halzova (75 keli) 1/4 fınalǵa shyqty. 

Taılandtaǵy irikteý týrnırinde Uljan Sársenbek (54 keli), Rımma Volosenko (60 keli) men Natalıa Bogdanova (66 keli) jarysty orta joldan aıaqtady. 

Qazir Qazaqstan quramasy qorjynynda Parıj Olımpıadasyna erlerde 6, áıelderde 1 joldama bar.