Parıj Olımpıadasyna qatysqan Danııar Shamshaev el chempıonatynda top jardy
ORAL. KAZINFORM — Oraldaǵy «Jaıyq arena» sport kesheninde eresekter arasynda dzıýdodan Qazaqstan chempıonaty jalǵasyn tapty.
Jeksenbi kúni bes salmaq dárejesinde jeńimpazdar men júldegerler belgili boldy.
Áıelder arasynda 57 kelige deıingi salmaqta aqtóbelik Baqyt Qusaqbaeva fınalda qyzylordalyq Dına Muhambetten aılasyn asyryp, altynnan alqa taqty.
Túrkistandyq Aıaýlym Qalmyrza men jetisýlyq Іńkár Tólepbergen qola júldeni mise tutty.
Qostanaılyq Samalaı Erǵalıeva (63 keli) sońǵy básekede atyraýlyq Damelıa Asylhanovany qapy qaldyrdy. Jambyldyq Asyljan Orynbasarova men qaraǵandylyq Valerııa Postnıkova úzdik úshtikke endi.
Fınalda almatylyq Kórkem Orymbekti jeńgen Móldir Narynova (70 kg) Jetisý oblysyna altyn syılady.
Bul salmaqta Shymkent qalasynan kelgen egizder Nursezim men Gúlsezim Turlybekter qola júldeni ózara sarapqa saldy. Júlde Nursezimge buıyrdy. Taǵy bir qolany atyraýlyq Shynar Bitimbaı aldy.
Erler arasynda jambyldyq Danııar Shamshaev 73 kelige deıingi salmaqta óziniń favorıt ekendigin dáleldep, jeńimpaz atandy. Parıj Olımpıadasynda baq synaǵan D. Shamshaev bıyl Horvatııadaǵy Eýropa kýboginde top jarǵan edi.
Jetisýlyq Darhan Qoıbaǵar kúmis, qaraǵandylyq Dastan Jumajanov pen Abaı oblysynyń ókili Dastan Shaıahmetov qola medalǵa ıe boldy.
Mańǵystaýlyq Asqar Narqulov 81 kelige deıingi salmaqta altynnan úmitkerlerdiń biri edi. Alaıda ol jaraqatyna baılanysty sońǵy beldesýge shyǵa almaǵandyqtan, jeńis astanalyq Mádı Amangeldige berildi. Abaı oblysynan Erzat Arǵynov pen taǵy bir mańǵystaýlyq Azat Kúmisbaı qolany qanaǵat tutty.
Dúısenbi kúni aýyr salmaqtaǵy dzıýdoshylar tatamıge shyǵady.
Eske sala keteıik, budan buryn Aıbek Imashevtiń dzıýdodan el namysyn eń myqtylar qorǵaıtynyn málimdegenin jazǵan edik.
Sondaı-aq dzıýdodan Qazaqstan birinshiliginde jasóspirimder arasynda álem chempıony fınalǵa deıin jetti.
Dzıýdoshy Abylaıhan Jubanazar alǵash ret Grand Slam týrnıriniń jeńimpazy atandy.
