Parıj Olımpıadasyna daıynmyn - para sportshy Dastan Muqashbekov
ALMATY. KAZINFORM – Parıj Olımpıadasyna 3 aıǵa jeter-jetpes ýaqyt qaldy. Joǵary jetistik kórsetý úshin sportshylar daıyndyq ústinde. Olardyń ishinde paralımpıadashylar da bar. Kazinform tilshisine 2023 jyldyń shilde aıynda Parıjde ótken álem chempıonatynda qola júldegeri atanyp, jazǵy oıynǵa lıtsenzııa utyp alǵan Dastan Muqashbekov kúndiz-túni jattyǵyp jatqanyn aıtty.
Dastan Muqashbekov 33 jasta. Sportqa bala kezinen beıim bolǵan, ásirese paýerlıfıngke qyzyǵýshylyq tanytqan.
«Mektep kezinen sportqa qyzyǵatynmyn. Densaýlyǵyma baılanysty qatysýǵa múmkindigim bolmady. Bir kúni telearnadan para sportshylardy kórip, «Sen de qatysa alasyń» dedim ózime. Aldyma maqsat qoıyp, joǵary deńgeıdegi sportshy atanýǵa sert ettim. Alǵashynda paýerlıftıngpen aınalysqym keldi. Atalǵan sport tek Temirtaýda bar eken. Meni jattyqtyrýshylar zalǵa shaqyryp, qabiletimdi tekserdi. Keıin bapkerler jeńil atletıkaǵa beıim ekenimdi baıqap, Shymkentte ótetin Qazaqstan chempıonatyna qatysýǵa usynys tastady. Kelistim. Qazir jeńil atletıkanyń ishinde ıadro laqtyrýmen aınalysamyn», - dedi ol.
Aıtýynsha, aty jeńil atletıka bolǵanymen, bul - ońaı sport túri emes.
«Tehnıkalyq, fızıkalyq turǵyda qıyn. Qazir meniń jańkúıerlerimniń sany artty. Olardyń qoldaýyn sezemin, atmosferasy unaıdy. Qazir álem chempıonaty men Gran-prı týrnırine daıyndalyp jatyrmyn. Oqý-jattyǵý jıyndary Almatyda mamyr aıyna deıin júrgiziledi. Sodan soń, Parıj Paralımpıadasyna daıyndyǵymyzdy kúsheıtemiz», - dedi Dastan Muqashbekov.
Sportshynyń sózinshe, qarsylastarynyń osaly joq. Bári de aýyz toltyryp aıtarlyqtaı dárejege jetken, óz eliniń myqty sportshylary.
«Solardyń qatarynda Germanııa, Týnıs, Meksıka elderiniń azamattary da bar. Olardy qurmetteımin. Jaqsy aralasamyz. Dospyz. Fızıkalyq daıyndyqtan bólek, psıhologııalyq daıyndyqtyń mańyzy zor. Ózimdi ishteı daıyndap qoıdym. Qalaı bolady, ne bolady dep janyńdy jegideı jeseń, keri áserin tıgizedi. Sportshy úshin qobaljýdyń bolýy qalypty jaǵdaı. Biraq men – daıynmyn», - deıdi ol.
Dene múmkindigi shekteýli tulǵalarǵa arnalǵana sporttyq daıarlaý ortalyǵynyń para jeńil atletıkadan komanda bastyǵy Máýlen Násipqalı Dastan Muqashbekov úzdik sportshylar qatarynan ekenin aıtty.
«Dastan Muqashbekov - Parıj Paralımpıadasynda jeńiske úmit kúttiretinderdiń qatarynda. Hanchjoýda ótken Azııa Para oıyndarynda Azııa rekordyn ornatqan myqtynyń biri. Afrıka, Azııa kontınentteriniń men men degen sportshylarymen básekege túsýde udaıy daıyndyq júrgizip kelemiz. ıAponııada ótetin chempıonatqa da lıtsenzııaǵa úmit bar», - dedi Dene múmkindigi shekteýli tulǵalarǵa arnalǵana sporttyq daıarlaý ortalyǵynyń para jeńil atletıkadan komanda bastyǵy Máýlen Násipqalı.
Buǵan deıin qazaqstandyq para sportshy Temirhan Daıyrbek akademııalyq eskek esýden Azııa chempıonatynda jeńiske jetip, Parıj-2024 Paralımpıada oıyndarynyń lıtsenzııasyna ıe bolǵany týraly jazǵan edik.
Bul qazaqstandyq sportshylardyń Parıj-2024 Paralımpıada oıyndaryna utyp alǵan 12-shi lıtsenzııasy. Buǵan deıin para paýerlıftıngten Davıd Degtıarev, para kanoedan Bıbarys Spataı, para jeńil atletıkadan Dastan Muqashbekov, para oq atýdan Erkin Ǵabbasov, voleıboldy otyryp oınaýdan ulttyq qurama komandasy, para júzýden 3 lıtsenzııa jáne para taekvondodan Kamılıa Dosmalova, Nyshan Omıralı jáne Nurlan Dombaev alǵan bolatyn.
Aıta ketsek 17-shi jazǵy Paralımpıada oıyndary bıyl Parıjde 28-shi tamyz ben 8-shi qyrkúıek aralyǵynda ótedi.
