Parıj Olımpıadasyna bokstan toǵyzynshy joldama Nazym Qyzaıbaıǵa buıyrdy

ASTANA. KAZINFORM – Bokstan Parıj Olımpıadasyna berilgen joldama sany 9-ǵa jetti. Bul joldamany el quramasynan Nazym Qyzaıbaı (50 keli) aldy.

Qazaqstandyq boksshy 1/4 fınalda Soltústik Koreıa boksshysy Kang Sý Hýangpen qolǵap túıistirdi. Sharshy alań tórindegi shaıqasta qazaqstandyq boksshynyń basymdyǵy baıqaldy. Nátıjesinde tóreshiler tolyqtaı onyń jeńgenine qoldaý bildirdi. Esep – 5:0.

Nazym Qyzaıbaı 1/4 fınalǵa deıin slovakııalyq Nıkol Dýrıkova, ulybrıtanııalyq Savanna Stýbleı, Ońtústik Koreıadan kelgen Djýhıýng Djýngty jeńgen bolatyn. 

Eske salsaq, budan buryn Taılandtaǵy týrnırde Valentına Halzova (75 keli) Parıj Olımpıadasyna berilgen joldamaǵa qol jetkizdi.

Endi el quramasynan óz salmaǵynda beriletin besinshi joldama úshin Muhammedsabyr Bazarbaıuly (63.5 keli) 17:30-da moldovalyq Aleksandrý Paraschıvpen sharshy alańǵa shyǵady.

Aıta ketsek, elimizdiń erler quramasynda Olımpıadaǵa Sáken Bıbosynov (51 keli), Mahmud Sabyrhan (57 keli), Aslanbek Shymbergenov (71 keli), Nurbek Oralbaı (80 keli), Aıbek Oralbaı (92 keli) jáne Qamshybek Qońqabaev (92 keliden joǵary) joldama alyp qoıdy. Áıelder quramasynda Karına Ibragımova (57 keli) Parıj Olımpıadasyna joldama alǵan edi.

Taılandtaǵy irikteý týrnırinde Uljan Sársenbek (54 keli), Rımma Volosenko (60 keli) men Natalıa Bogdanova (66 keli) jarys jolyn aıaqtady.