Parıj Olımpıadasyna arnalǵan kıim formasynyń dızaınyna jańa konkýrs jarııalandy

ASTANA. KAZINFORM – Sport jáne dene shynyqtyrý komıtetiniń «Sportty damytý dırektsııasy» Parıjdegi jazǵy Olımpıadaǵa arnalǵan Qazaqstan Ulttyq quramasynyń kıim formasy men oǵan qosymsha kerek-jaraq jabdyqtardyń dızaın tujyrymdamasyn ázirleýge arnalǵan konkýrs qaıtadan jarııalanǵanyn habarlady.

Osyǵan deıingi aqpan aıynda bastalǵan Qazaqstan ulttyq quramasynyń kıim formasy men oǵan qosymsha kerek-jaraq jabdyqtardyń dızaın tujyrymdamasyn ázirleýge arnalǵan konkýrsta qatysýshylardyń eshbir eskızi komıssııa músheleriniń kóńilinen shyqpaýyna baılanysty komıssııa 1-shi konkýrsty ótpedi dep sheshim shyǵardy.

Kıimder tý ustaýshylar, saltanatty rásim men jattyǵýǵa arnalǵan juptan turady. Konkýrs kezinde kelip túsken jumystardy arnaıy komıssııa quramy qarap, ortaq sheshim qabyldaıdy.

Jumys tobynyń qataryna Týrızm jáne sport mınıstrligi Sport jáne dene shynyqtyrý komıteti, QR Ulttyq Olımpıada komıteti, Qazaqstan sportshylary odaǵynyń ókilderi, dańqty sportshylarymyz ben BAQ qyzmetkerleri kiredi. 

Bul qatarda Eldos Smetov, Serik Sapıev, Azamat Dáýletbekov, Jámılá Baqbergenova, Olga Rypakova, Ábıba Abýjaqynova, Anna Alıabeva, Nurbek Oralbaı, Nursultan Tursynovty atap ótýge bolady. 

Komıssııa tóraǵasy – Sportty damytý dırektsııasynyń dırektory Erlan Estek.

Konkýrs eki kezeńge sozylady jáne árbir kezeń jeńimpazy ereje sharttaryna sáıkes komıssııa otyrysynda anyqtalady.

Konkýrs kezeńderi:

I kezeńde komıssııa konkýrsqa qatysýshylar ótinishterin, materıaldaryn qabyldap, qaraıdy (2024 jylǵy 10 sáýir 20:00-den 15 sáýir saǵat 18:30 deıin).

ІІ kezeńde konkýrs jeńimpazdary anyqtalyp, jarııalanady (2024 jylǵy 16-17 sáýir aralyǵy).

Konkýrsqa qatysýshylarǵa túsindirý jumysyna jáne jalpy konkýrs ótkizýge QR TSM Sport jáne dene shynyqtyrý komıteti Sportty damytý dırektsııasynyń Memlekettik satyp alý bóliminiń bastyǵy Erjan Asqarov jaýapty.