Parıj-2024: Ortalyq sport klýbynyń sportshylary 20 olımpıadalyq lıtsenzııa utyp aldy
ASTANA. KAZINFORM — Qorǵanys mınıstrligi Ortalyq sport klýbynyń sańlaqtary baıraqty dodada sporttyń on túri boıynsha básekege túsedi. Atap aıtqanda sportshylar el jáne ásker namysyn bokstan, dzıýdodan, atýdan, badmıntonnan, eskek esýden, sporttyq gımnastıkadan, kúresten, sporttyq alpınızmnen, thekvondo jáne zamanaýı bessaıystan qorǵaıtyn bolady. Bul týraly vedomstvonyń baspasóz qyzmeti málim etti.
Olımpıadada bokstan leıtenant Sáken Bıbosynov, merzimdi qyzmettegi qatardaǵy jaýynger Muhamedsabyr Bazarbaıuly jáne Qarýly kúshterdiń qyzmetshisi Mahmud Sabyrhan, grek-rım kúresinen kishi serjant Aıdos Sultanǵalı, qatardaǵy jaýynger Álimhan Syzdyqov, Qarýly kúshterdiń qyzmetshileri Demeý Jabraev pen Nursultan Tursynov, sporttyq gımnastıkadan — QK qyzmetshileri Narıman Qurbanov, zamanaýı bessaıystan — QK qyzmetshisi Elena Potapenko, oq atýdan — kishi serjant Ásem Orynbaı jáne QK qyzmetshisi Islam Sátbaev, thekvondodan — QK qyzmetshileri Somırhon Ababakırov jáne Batyrhan Tóleýǵalı, sporttyq alpınızm boıynsha — QK qyzmetshisi Ámir Maımuratov, badmıntonnan — QK qyzmetshisi Dmıtrıı Panarın, dzıýdodan — aǵa leıtenant Ǵusman Qyrǵyzbaev, qatardaǵy jaýyngerler Danııar Shamshaev, Abylaıhan Jubanazar jáne QK qyzmetshisi Kámıla Berliqash, baıdarka esýden — QK qyzmetshisi Sergeı Tokarnıtskıı jarystarda baqtaryn synaıdy. 2016 jyly Rıo-de-Janeıro Olımpıadasyna ásker sportshylary 8 lıtsenzııa alsa, 2021 jyly Tokıoda — 18, al 2024 jyly Parıjge — 20 lıtsenzııa jeńip aldy.
— Ásker sportshylary irikteý jarystarynda barynsha jaqsy nátıje kórsetti. Daıyndyq deńgeıleriniń básekeli bolǵanyn alǵan lıtsenzııalar rastaıdy. Parıjdegi Olımpıadada úzdik tanylý úshin myqty nátıjeler kórsetedi dep senemiz, - dedi Qorǵanys mınıstrligi Sport komıtetiniń tóraǵasy polkovnık Arman Ábeýov.
Búgingi tańda QR Qorǵanys mınıstrliginiń Sport komıteti — Ortalyq sport klýbynda 20-ǵa jýyq sport túri keń damyp keledi. 180-nen asa armııalyq sańlaq túrli sporttan ulttyq quramanyń músheleri. 2024 jyldyń basynan beri armııa qorjynynda 204 medal bar: onyń — 91-i altyn, 52-si kúmis jáne 61-i qola.
