Parıj Olımpıadasy qarsańynda júzdegen tiginshi jumys istep jatyr

ASTANA. KAZINFORM – Frantsııa boıynsha 500-den astam tiginshi men dızaıner Parıjde ótetin jazǵy Olımpıada oıyndarynyń ashylý jáne jabylý saltanatyna arnalǵan myńdaǵan biregeı kostıýmdi tigip, aıaqtaý úshin baryn salyp jatyr. Bul týraly France24.com jazdy. 

Qolónershiler armııasy Parıj Olımpıadasynyń saltanatty rásimderine arnalǵan myńdaǵan kostıým tigýde. Dızaınerlerdiń aıtýynsha, ár kıim úlgisi tarıh, sport jáne sán-saltanattyń biregeı úılesimi bolady. 

«Biz álemdegi eń úlken saýyq keshin ótkizgeli otyrmyz», - dedi Olımpıadany uıymdastyrý komıtetiniń kostıýmder jónindegi dırektory Dafna Býrkı. 

Ol buryn «Dior»-da Djon Galıaanonyń qol astynda jumys istegen. 

Kostıýmderdi daıyndaýǵa 15-ke jýyq dızaıner jumyldyrylǵan, olar 500-ge jýyq sheberge jetekshilik etýde. Atalǵan qyzmetkerler Olımpıada jáne Paralımpıada oıyndarynyń ashylý jáne jabylý saltanatynda jumys isteıdi. 

26 shildede Sena ózeni men onyń kópirleriniń boıynda ótetin 7 shaqyrymdyq alǵashqy saltanatty rásimge 200-ge jýyq kostıým dızaıneri men 300 vızajıst qatysady dep kútilip otyr. 

«Kıim qaldyqtary men lastanýy týraly alańdaýshylyq kúsheıip kele jatqan dáýirde «buryn ómir súrgen jáne keıin de bolatyn» vıntajdy jáne kıilgen kıimdi paıdalanýǵa qatty kóńil bólinýde. Sizder úsh myń erekshe sulbany kóresizder jáne ár kıim óz tarıhyn baıandaıdy», - degen D.Býrkı.

Ol 3 myń kıimniń arasynda eki birdeı kostıým bolmaıdy dep ýáde berdi.