Parıj Olımpıadasy: Jibek Joly kórermenderin ne kútip tur
ASTANA. KAZINFORM — Parıj Olımpıadasynyń saltanatty túrde ashylýyna sanaýly kún qaldy. Jibek Joly telearnasy osy sharany jáne oıyndardyń birqataryn tikeleı efırde kórsetedi. Qazir telearnada translıatsııaǵa daıyndyq jumystary pysyqtalyp jatyr.
«Bizdiń telearna úshin Parıj Olımpıadasyn tikeleı kórsetilimde taratý — tarıhı oqıǵa. Halyqaralyq Olımpıada komıtetine sporttyq oıyndardy taratatyn telearna retinde resmı tirkeý jóninde ótinim joldadyq. Eki aptanyń ishinde tirkedi. Kelisimge sáıkes Olımpıada oıyndaryn tikeleı kórsetilim arqyly kópshilikke tarata alamyz. Jibek Joly telearnasynyń kórermenderi ár juma, senbi jáne jeksenbi kúni (saǵat 22:00–ge deıin) teledıdardan bólek, elordadaǵy Abu Dhabi Plaza oıyn-saýyq jáne saýda ortalyǵy aýmaǵynda LED ekran arqyly kóre alady», — deıdi Jibek Joly telearnasynyń kreatıvti prodıýseri Dınara Abakaeva.
Odan bólek, Jibek Joly telearnasy elorda ákimdiginiń qoldaýymen Parıj Olımpıadasynyń ashylý saltanatyn ortalyq saıabaqta tikeleı efırde kópshiliktiń nazaryna usynbaq. Saltanatty shara aıasynda kontsert te ótedi.
Olımpıadanyń ashylý saltanatynan tikeleı kórsetý kezinde Sıdneı Olımpıadasynyń kúmis júldegeri Islam Baıramýkov telearna stýdııasynyń qurmetti qonaǵy bolmaq.
«Qazaqstandyq sportshylar qatysatyn jarystardan bólek, top oıyndardyń fınalyn kórermenderge usynamyz. Telearnanyń shamamen 70% efıri Parıj Olımpıadasy oıyndaryna arnalady», — deıdi kreatıvti prodıýser.
Al sport oıyndary barysynda telearnanyń 9 kommentatory kezekpen eki tilde (qazaqsha, oryssha) qyzmet kórsetedi.
«Tikeleı kórsetilimge daıynbyz, tehnıka qazirdiń ózinde testileý rejıminde táýlik boıy jumys istep tur. Tikeleı baılanys belgisin Parıj ben Londonnan, sonymen qosa Astanadaǵy Qazmedıa ortalyǵy arqyly alamyz. Tehnıkalyq turǵydan daıyndyqqa bir aı ýaqyt ketti, kún saıyn 3-4 maman aýysymmen jumys isteıdi. Sport jarystarynyń tikeleı efıriniń kestesi berildi», — deıdi Jibek Joly telearnasynyń tehnıkalyq qamtamasyz etý jónindegi aýysym jetekshisi Saıan Makımov.
Aıta keteıik, 26 shilde men 11 tamyz aralyǵynda ótetin XXXIIІ Olımpıada oıyndaryn Qazaqstan aýmaǵynda kórsetý quqyǵyn otandyq 5 telearna ıelendi.
Qazaqstandyqtar Olımpıada oıyndaryn Jibek Joly telearnasynan bólek, Qazaqstan, Qazsport, «Habar» jáne «El arna» efırinen kóre alady.
