Parıj Qudaı ana sobory kelesi jyldyń sońynda kelýshilerge esigin ashady
Bul ǵımaratqa aıtarlyqtaı nuqsan keltirgen órtten keıin alty jylǵa jýyq ýaqyttan keıin bolatyn oqıǵa.
Qazirgi ýaqytta Frantsııa prezıdenti Emmanýel Makron belgilegen ýaqytqa, ıaǵnı 2024 jyldyń jeltoqsanyndaǵy ashylýǵa úlgerý úshin qalpyna keltirý jumystary qarqyndy júrip jatyr.
Biraq Notr Dam 2024 jyldyń jazynda bolatyn Parıjdegi Olımpıada oıyndaryna deıin tolyq daıyn bolyp úlgermeıtini belgili.
«Meniń mindetim – sobordy 2024 jyly ashý, biz muny isteımiz», - dep ýáde berdi qalpyna keltirý jobasyna jaýapty general Jan-Lýı Jorjelen.
Mádenıet mınıstri Rıma Abdýl Malak sobor kelýshiler úshin ashylǵanymen, jumys munymen tolyq bitpeıtinin aıtty. Onyń sózinshe, «2025 jyly qalpyna keltirý jalǵasady».
Parıjdiń negizgi kórnekti jerin qalpyna keltirý jumysy eki jyldan asa jóndeýden keıin 2022 jyly bastaldy.
Áýeli sheberler qalpyna keltirýge kirisý úshin ǵımaratty myqty ári qaýipsiz etý kerek boldy.
Bılik XII ǵasyrdyń jaýharyn burynǵy qalpyna keltirýdi sheshti. Oǵan arhıtektor Ejen Vıolle le Dıýk jobalaǵan 19 ǵasyrdaǵy 96 metrlik tóbeni qaıta qurý kiredi.
Órt kezinde qıraǵan sobordyń ortalyq elementi bıyl Notr Dam tóbesinde qaıta kórinedi.
«Parıj aspanyna munarany qaıtarý bizdiń Notr Dam úshin kúreste jeńiske jetip jatqanymyzdy bildiredi», - deıdi general Jorjelen.
Sobordy qalpyna keltirý úshin Frantsııanyń túkpir-túkpirinde myńdaǵan adam jumys istep jatyr.
Búgin Parıjde «Notr Dam de Parı: qurylys júreginde» dep atalatyn kórme ashylady. Ol sobordy qalpyna keltirýge at salysyp jatqan júzdegen mamanǵa tıisinshe baǵa beredi.
Ekspozıtsııa sobordyń aldyndaǵy jerasty bólmesinde ornalasqan. Kirý tegin.
Kórmede sobordy qalpyna keltirý úshin qandaı jumystar istelip jatqany aıtylady. Bul jerden órt kezinde búlinbeı saqtalǵan keıbir óner týyndylaryn kórýge bolady.
