Parıj Qudaı Ana sobory qaıta ashylady
ASTANA. KAZINFORM – 2019 jyly alapat órtten zardap shekken álemdik mádenı mura sanalatyn Parıj Qudaı Ana sobory uzaq ýaqytqa sozylǵan qalpyna keltirý jumystarynyń nátıjesinde, 2024 jyldyń 7 jeltoqsanynda qaıta ashylady, dep habarlaıdy RFI halyqaralyq frantsýz radıosy.
Sobordyń ashylý saltanatyna 50-den astam eldiń basshylary shaqyrylǵan. Frantsııa prezıdenti Emmanýel Makron shara barysynda sóz sóıleıdi.
AQSh-tyń burynǵy prezıdenti Donald Tramp «Truth Social» platformasynda bul sharaǵa qatysatynyn rastady. Al qazirgi prezıdent Djo Baıdenniń ornyna onyń jubaıy Djıll Baıden qatysady.
7 jeltoqsanda soborda arnaıy ashylý rásimi men dinı sharalar ótedi. Al 8 jeltoqsanda, Qasıetti Marııanyń merekesine oraı, uzaq jyldardan keıin alǵash ret messa ótkizilip, sobordyń negizgi bóligi kópshilikke qoljetimdi bolady. Osy kúnderi qaýipsizdik sharalary kúsheıtilip, sobor mańynda 6000-ǵa jýyq polıtsııa men jandarm qyzmet atqarady.
Shara sońynda álemge tanymal ártisterdiń qatysýymen kontsert uıymdastyrylady. Bul merekelik kesh Frantsııa televızııasynda tikeleı efırde kórsetiledi.
Aıta keteıik, 2019 jylǵy órtten keıin alǵash ret Parıj Qudaı ana soborynyń qońyraýlary soǵyldy.
Parıj Qudaı ana sobory 2024 jyldyń sońynda kelýshiler men qulshylyq etýshilerge ashylatynyn jazǵan bolatynbyz.