Parıj kóshelerine 110 myń adam narazylyq sherýine shyqty
ASTANA. KAZINFORM – Parıj polıtsııasy prefektýrasynyń málimetinshe, 24 qazanda ómir súrý qunynyń qymbattaýyna qarsy uıymdastyrylǵan narazylyq sherýine shamamen 110 myń adam qatysty. Jalpy qala men onyń mańyndaǵy jaǵdaı tynysh, dep habarlaıdy Kazinform agenttiginiń menshikti tilshisi.
Narazylyq bildirýshiler sherýi kúndiz Parıjdiń 13-okrýgindegi Port-d’Italı aýdanynan bastalyp, jergilikti ýaqyt boıynsha saǵat 17:00-de Port-de-Vensenge jetti. Sherý baǵyty qalanyń shetindegi Marshaldar býlvarlary arqyly ótti.
Bul baǵytty polıtsııa prefektýrasy aldyn ala bekitken. Bastapqyda uıymdastyrýshylar sherýdi Bastılııa alańynan Nason alańyna deıin ótkizýdi josparlaǵan. Alaıda tańerteń ákimshilik sot baǵytty ózgertýge qatysty uıymdastyrýshylardyń shaǵymyn qanaǵattandyrmady.
Narazylyq aktsııasy qarsańynda Frantsııa bıligi qaýipsizdik sharalaryn kúsheıtti. El boıynsha shamamen 70 myń polıtsııa qyzmetkeri men jandarm jumyldyryldy. Bul 17 qazandaǵy kórsetkishten 20%-ǵa kóp.
Qaýipsizdik maqsatynda Parıjde Lývr, Orse jáne Pıkasso mýzeıleri sııaqty iri mádenı nysandar ýaqytsha jabyldy. Qalanyń birqatar aýdanynda dúken ıeleri kúzetti kúsheıtip, ǵımarattardyń aldyna qorǵanys qalqandaryn ornatty. Al Elıseı alańdary men Trıýmf arkasy mańynda «Sentınel» operatsııasyna qatysatyn áskerı qyzmetshiler kezekshilik atqardy.
17 qazanda Frantsııa Іshki ister mınıstrliginiń baǵalaýynsha, el boıynsha narazylyq aktsııalaryna shamamen 550 myń adam, onyń ishinde Parıjde 110 myńǵa jýyq turǵyn qatysqan. Al uıymdastyrýshylar qatysýshylar sany 800 myńǵa deıin jetkenin málimdedi.
Sol kezdegi keıbir sherýler qaqtyǵystarǵa, órt qoıý jáne tonaý oqıǵalaryna ulasyp, 2000-nan astam adam ustalǵan.
24 qazandaǵy narazylyq aktsııasy «Ekinshi akt» dep atalatyn qozǵalys aıasynda uıymdastyryldy. Oǵan kásipodaqtar, stýdentter men lıtseı oqýshylarynyń birlestikteri, sondaı-aq «sary jıletter» qozǵalysynyń ókilderi qatysty.
Uıymdastyrýshylar halyqtyń satyp alý qabiletin arttyrýdy jáne memlekettik qyzmetterdi qorǵaýdy talap etip otyr.
Lıon, Marsel, Nant jáne Bordo qalalarynda jekelegen qaqtyǵystar tirkelgenimen, Parıjdegi negizgi sherý polıtsııa málimetinshe, beıbit jaǵdaıda ótti.
Aıta keteıik, buǵan deıin Frantsııa bıligi 24 qazandaǵy jappaı narazylyq aktsııalaryna baılanysty el boıynsha 70 myń polıtsııa qyzmetkeri men jandarmdy jumyldyrǵan bolatyn. Qaýipsizdik sharalary aıasynda Parıjdegi birqatar mádenı nysan ýaqytsha jabyldy.
