Parıj kóshelerin tazalaýǵa kommýnaldyq qyzmetkerler úsh ese kóp jumyldyryldy
ASTANA. KAZINFORM – Frantsııa astanasynda jappaı tártipsizdikterden keıin kelesi kúni qalalyq kommýnaldyq qyzmetter kóshelerdi tazartý jumystaryna kiristi, dep habarlaıdy Kazinform agenttiginiń menshikti tilshisi.
Frantsııa astanasynyń kóshelerin aýqymdy tazartý jumystary jeksenbi kúni tańerteń erte bastaldy. Jergilikti buqaralyq aqparat quraldarynyń málimetinshe, túngi saǵat úshten bastap qalada tazalyq qyzmetiniń myńnan astam qyzmetkeri jumysqa kirisken. Bul ádettegi demalys kúnderindegi kórsetkishten úsh ese kóp.
Olar joldar men jaıaý júrginshiler joldaryn tazalap, qırandylar men qoqystardy jınap, sondaı-aq eń kóp zardap shekken aýmaqtardyń, ásirese Respýblıka alańy mańynyń qaýipsizdigin qamtamasyz etip jatyr. Qalypty ómirdi múmkindiginshe tez qalpyna keltirý úshin kúsheıtilgen toptar aýdan ákimderimen birlesip jumys isteýde.
Parıj qalalyq ákimdigi bir kún buryn bolǵan qıratý áreketteri men talqandaýlardy qatań aıyptap, asa kúrdeli jaǵdaıda jumys istep jatqan qyzmetkerlerine alǵys bildirdi.
Parıj meri Emmanıýel Gregýardyń aıtýynsha, «tutas kósheler júıeli túrde talqandalǵan». Ol keltirilgen shyǵynnyń aýqymy orasan zor bolatynyn málimdedi.
Parıj polıtsııa prefektýrasynyń málimetinshe, 17 qazandaǵy oqıǵalar kezinde elordada 855 adam ustalǵan. Bul — rekordtyq kórsetkish. Quqyq qorǵaý organdarynyń 13 qyzmetkeri men eki órt sóndirýshi zardap shekken.
Buǵan deıin Frantsııa premer-mınıstri Parıjdegi jappaı qıratýlardyń aýqymy týraly aıtqan bolatyn.
Aıta ketelik Makron Frantsııadaǵy jappaı tártipsizdikke qatysqandardy jazalaýǵa ýáde bergen edi.
