Parıj qonaq úıinde shańsorǵyshtyń ishinen qymbat gaýhar tasty júzik tabyldy

Parıjdegi sándi Ritz qonaqúıinde joǵalǵan 750 myń eýro turatyn júzik shańsorǵyshtyń ishinen tabyldy. Kazinform bul týraly VVS-ge silteme jasap habarlaıdy.

Áshekeı ıesi malaızııalyq kásipker juma kúni polıtsııaǵa júzigi joǵalǵanyn habarlap, ony qonaqúı qyzmetkerleriniń biri urlaýy múmkin ekenin aıtqan.

Biraq Le Parisien gazetiniń habarlaýynsha, tanymal qonaqúı kúzetshileri ony jeksenbi kúni shańsorǵyshtyń ishindegi shań jınaıtyn qaptan tapqan.

Onyń ıesi Parıjden Londonǵa ushyp ketken, biraq júzigin alyp ketý úshin oralady, dep jazdy basylym.

Halyqaralyq sándi qonaqúı jelileriniń ókilderi ótemaqy retinde úsh tún tegin turýdy usynǵan, biraq ol usynysty qabyldaǵysy kelmeıtin tárizdi.

«Kúzetshilerdiń muqııat jasalǵan jumysynyń arqasynda búgin tańerteń júzik tabyldy. Biz Ritz qonaqúıiniń qyzmetkerlerine alǵys aıtqymyz keledi. Olar júzikti izdeýge kómektesip, kún saıyn kásibıligi men jumysyna adal ekenin kórsetti», — delingen Ritz málimdemesinde.

Áshekeı ıesi polıtsııaǵa juma kúni júzikti qonaqúıdegi ústelge qoıyp, qala ortalyǵyndaǵy dúkenderdi aralaýǵa ketken.

Birneshe saǵattan keıin kelgende sırek kezdesetin gaýhar taspen kómkerilgen júzikti ústel ústinen taba almaı qalǵan.

Qazir joǵalǵan zat polıtsııada, ıesi kelip alyp ketkenshe sonda bolady.

Tanymal bes juldyzdy Ritz qonaqúıi Parıj ortalyǵyndaǵy Vandom alańynda ornalasqan. Oǵan qaltaly jáne tanymal adamdar jıi kelip turady.

Ol jerden baǵaly zattar buryn da joǵalǵan.

2018 jyly baltamen qarýlanǵan adamdar ishindegi zergerlik dúkendi tonap, birneshe mıllıon eýro turatyn áshekeı buıymdardy alyp ketken.

Sol jyly aty atalmaǵan Saýd Arabııasy korol otbasynyń ókili qonaqúıdegi nómirinen quny 800 myń eýro bolatyn áshekeı buıymdary joǵalǵanyn málimdegen edi.