Parıj bıligi Eýro-2016 fınaly aldyndaǵy teńdessiz qaýipsizdik sharalary týraly málimdedi
ASTANA. QazAqparat - Fýtbol boıynsha 2016 jylǵy Eýropa chempıonatynyń aqtyq matchyna baılanysty, Parıj qaýipsizdik kúshteri qalany qaýipsizdiktiń eń joǵary deńgeıimen qamtamasyz etedi. Bul týraly jergilikti bılik habarlady.
Parıj ákimshiliginiń basshysy Matıas Vısheranyń aıtýynsha, Eıfel munarasy janyndaǵy fan-aımaqty 2 myńǵa jýyq polıtsııa qyzmetkeri kúzetetin bolady. Qala polıtsııasynyń basshysy Mıshel Kado matchtan keıingi saltanatty shara ótetin Elıseı alańdarynda 3,4 myń polıtsııa júretinin aıtty.
Qaýipsizdikti kóbeıtetin úshinshi mańyzdy nysan - chempıonattyń aqyrǵy oıyny ótetin «Stad de Frans» stadıony bolmaq. Alań qojaıyndary quramasy men Portýgalııa quramasy kezdesetin bul stadıondy 3,5 myń polıtsııa kúzetedi.
