Parıj ben Nıý-Iork te sý astynda qalǵan – «Astana bas jospary» elorda kóshelerin basqan sý jaıly

ASTANA. QazAqparat – «Astana bas jospary» JShS dırektorynyń orynbasary Erkebulan Faızýllaev elordada jańbyr sýynyń nelikten káriz júıelerine ketpeı, kóshege jaıylyp ketetinine qatysty pikir bildirdi, dep habarlaıdy QazAqparat tilshisi.

«2035 jylǵa deıingi Bas josparda qalany jańbyr sýyna arnalǵan káriz júıesimen tolyq qamtý kózdelgen. Ol úshin 2025 jylǵa deıin káriz sýyn tazalaıtyn 7 nysan salý kerek. 2035 jylǵa deıin taǵy 7 nysan salý oryndy. Qazir káriz júıeleri arqyly jańbyr sýynyń tek 70 paıyz ǵana aǵady. Sondyqtan aldaǵy eki jylda káriz sýyn tazartý nysandaryn salý kerek. Bul taıaý arada bolýy múmkin máselelerdi tolyq sheshedi. Al bolashaqta qalanyń ári qaraı damıtynyn eskersek, onda 2035 jylǵa deıin taǵy 7 tazartý nysanyn salý qajet bolady», - dedi Erkebulan Faızýllaev.

Onyń sózinshe, qazirgi káriz júıeleri qazirgi zamanǵy normatıvtik talaptarǵa jaýap bermeıdi.

«Qazir qoldanystaǵy jańyr sýyna arnalǵan káriz júıeleri keńestik normatıvtermen salynǵan, tısinshe eski. Keshe aılyq normadan artyq jaýyn tústi. Bir sátte kóp kólemde sý túsken soń káriz júıesiniń oǵan qaýqary jetpeı qaldy. Bul álemdik deńgeıdegi klımattyq ózgeris saldarynan bolyp otyr. Tipti Parıj ben Nıý-Iork te sý astynda qalǵan», - dep málim etti Erkebulan Faızýllaev.

Eske salaıyq, osy aıdyń basynda Astanany sý basty. Artynsha káriz júıelerine jaýapty bolǵan «Elorda eco system» kompanııasynyń dırektory qyzmetinen ketken bolatyn.