Parıj ben London Ormýz buǵazyndaǵy halyqaralyq mıssııany basqarady
ASTANA. KAZINFORM – Frantsııa men Ulybrıtanııa Ormýz buǵazynda keme qatynasynyń qaýipsizdigin qamtamasyz etýge baǵyttalǵan halyqaralyq mıssııany basqarýǵa nıetti, dep habarlaıdy DW.
Parıjde ótken Ormýz qaýipsizdigine arnalǵan halyqaralyq konferentsııa qorytyndysy boıynsha Ulybrıtanııa premer-mınıstri Kır Starmer men Frantsııa prezıdenti Emmanıýel Makron tıisti málimdeme jasady.
– Bul mıssııa tek beıbit jáne qorǵanystyq sıpatta bolady jáne kommertsııalyq keme qatynasynyń qaýipsizdigin qamtamasyz etýge, sondaı-aq mınalardy zalalsyzdandyrý jumystaryn qoldaýǵa baǵyttalady. Qazirgi tańda onnan astam el osy bastamaǵa qatysýǵa daıyn ekenin bildirdi, – dedi Kır Starmer Parıjdegi birlesken baspasóz máslıhatynda.
Kezdesýge Germanııa kantsleri Frıdrıh Merts pen Italııa premer-mınıstri Djordja Melonı de qatysty. Sonymen qatar 50-ge jýyq el men halyqaralyq uıym ókilderi onlaın formatta qosyldy.
Frıdrıh Merts Germanııanyń mıssııaǵa qatysýǵa daıyn ekenin atap ótti.
– Germanııa Ormýz buǵazyndaǵy qaýipsizdikti qamtamasyz etý operatsııasyna qatysýǵa ázir. Bul aıasynda mınalardy zalalsyzdandyrý jáne teńizdegi barlaý jumystaryn júrgizý qarastyrylýy múmkin. Alaıda áskerı kúshterdi ornalastyrý úshin Taıaý Shyǵystaǵy qaqtyǵystyń aıaqtalýy mańyzdy shart bolyp qala beredi, – dedi ol.
Sondaı-aq Germanııa tarapy mıssııaǵa AQSh-tyń qatysýy quptarlyq ekenin jetkizdi.
Aıta keteıik, Ormýz buǵazynda AQSh blokadasyna qaramastan keme qatynasy jalǵasyp jatyr.