Parıj-2024: Velosporttan Olımpıadada el namysyn kimder qorǵaıdy
ASTANA. KAZINFORM – Tas joldaǵy velosporttan Qazaqstan komandasy Parıj Olımpıadasyna qatysatyn sportshylar esimin jarııalady.
QR Ulttyq olımpıadalyq komıteti málim etkendeı, Frantsııa astanasynda elimizdiń namysyn eki shabandoz qorǵamaq. Naqtyraq aıtsaq, tórtjyldyq dodada el namysyn Evgenıı Fedorov pen Alekseı Lýtsenko qorǵaıdy.
Qazaqstan quramasynyń aǵa jattyqtyýshysy Danııl Fomınyhtyń aıtýynsha, eki sportshy qazir Astana Kazakhstan Team velokomandasy sapynda iri jarystarǵa qatysýda.
Tas joldaǵy velosporttan Qazaqstan komandasy enshisinde úsh lıtsenzııa bar. Úsheýi de jekelegen sportshylarǵa emes, komandaǵa berildi. Parıj oıyndaryna kvota 2023 jylǵy maýsymdaǵy qurama nátıjesine qaraı bólindi. UCI álemdik reıtıngi boıynsha Qazaqstan komandasy 3660.24 upaımen 19-orynnan kóringen. Bir kvota jekeleı jarysqa, eki kvota toptyq jarysqa berilip otyr.
Bir qyzyǵy, Parıjge attanatyn eki velosportshymyz da anderler arasynda álem chempıony atanǵan. Alekseı Lýtsenko 2012 jyly top jarsa, Evgenıı Fedorov araǵa on jyl salyp, 2022 jyly altyn medal jeńip aldy.
Qazaqstan komandasynyń úzdigi Alekseı Lýtsenko úshin bul ekinshi Olımpıada bolmaq. Ol Tokıodaǵy jazǵy oıyndarǵa qatysyp, toptyq synda 21, jekeleı synda 32-orynnan kórindi. Al Rıo Olımpıadasy qarsańynda jaraqatyna baılanysty jarystan bas tartqan edi. Lýtsenko Azııa oıyndarynyń úsh dúrkin chempıony, 2017 jylǵy Azııa birinshiliginiń jeńimpazy. «Výelta» jáne «Týr de Frans» kópkúndikteriniń bir kezeńinde jeńiske jetken. Alekseıdiń úlken sporttaǵy jeńisti kezeńi 2012 jylǵy jastar arasyndaǵy álem birinshiliginiń altynynan bastalǵan bolatyn.
Al Evgenıı Fedorov úshin bul óz mansabyndaǵy alǵashqy Olımpıada bolmaq. Jas sportshy buǵan deıin 2018 jyly Argentınada ótken jasóspirimder Olımpıadasynda top jarǵan. Odan bólek, Fedorovtyń enshisinde 2023 jylǵy Azııa oıyndarynyń altyny bar. Sondaı-aq, Evgenıı anderler arasynda álem chempıony atanyp, Azııa chempıonattarynda eki márte jeńiske jetken.
Qazaqstan táýelsizdik alǵaly beri jazǵy Olımpıadada velosporttan eki medal jeńip alǵan. Onyń ekeýi de Aleksandr Vınokýrovqa tıesili. Dańqty velosportshy 2000 jylǵy Sıdneı Olımpıadasynda kúmis, 2012 jylǵy London Olımpıadasynda altyn medal jeńip alǵan bolatyn.
27 shilde kúni velosportshylar jekeleı synda Parıj Olımpıadasynyń jeńimpazyn anyqtaıdy. Al erler arasyndaǵy toptyq jarys 3 tamyzǵa josparlanǵan.
Esterińizge sala keteıik, bıylǵy Frantsııa astanasy Parıjde ótetin HHHІІІ jazǵy Olımpıada oıyndary 26 shilde men 11 tamyz aralyǵynda ótedi.
