Parıj-2024: Sadaqshylarymyz Olımpıadadaǵy alǵashqy irikteýin ótkizdi

PARIJ. KAZINFORM – Búgin Parıj Olımpıadasynda qazaqstandyq sportshylardan alǵashqy bolyp synǵa túsken sadaqshylarymyz jekeleı syndaǵy irikteý jarystaryn aıaqtady.

Nátıjesinde Qazaqstan quramasynan úzdik nátıjeni Dáýletkeldi Jańbyrbaı kórsetti. Ol 668 upaımen 22-satydan kórindi. Al Ilfat Abdýllın 663 upaı jınap, 29-orynǵa turaqtady. Aleksandr Eremenko bolsa 59-orynda. Onyń enshisinde 640 upaı bar.

Aıta keteıik, endi osy reıtıngtik kezeń nátıjesine qaraı keıingi jarys joly qurylady. ıAǵnı, 64 er mergen búgin alǵan ornyna qaraı bir-birimen synasady. Mysaly, 1-oryn alǵan atlet pleı-off satysynda 64-satydaǵy sportshyǵa qarsylas boldy. Al pleı-off 30 shilde men 1 tamyz aralyǵyna josparlanǵan. Al komandalyq saıys 29 shildeden bastaý alady.

Sadaq atýdan erler arasynda Olımpıada rekordyn Rıo-de-Janeıroda Výdjın Kım (Ońtústik Koreıa) tirkegen (700 upaı). Al álem rekordy amerıkalyq Bredı Ellısonǵa tıesili (702 upaı, Lıma qalasy, 2019 jylǵy 7 tamyz).

Erteń, 26 shildede keshke Parıj Olımpıadasynyń resmı ashylýy ótedi. Memlekettik Týdy boksshy Aslanbek Shymbergenov pen Olga Safronova (jeńil atletıka) ustaıdy. 

Aıta keteıik, Parıjdegi jazǵy Olımpıadada Qazaqstan quramasynyń 80 atleti 25 sport túrinen synǵa túsedi.

Esterińizge sala keteıik, Frantsııa astanasy Parıj qalasynda ótetin XXXIII jazǵy Olımpıada oıyndary 11 tamyzda máresine jetedi. Oıyndarǵa álemniń 205 elinen 10 500 sportshy qatysady dep josparlanǵan.