Parıj-2024: Olımpıadada semserlesýden el namysyn qorǵaıtyn sportshylar anyqtaldy

ASTANA. KAZINFORM – Parıj Olımpıadasynyń bastalýyna búgin týra 23 kún qaldy. Qazaqstandyq sportshylar arasynda keıbir jekelegen sport túrlerinen basty dodaǵa baratyn atletterdiń qatary tolyǵyp, esimderide anyqtalyp jatyr.

Búgin QR Ulttyq olımpıadalyq komıteti jazǵy Olımpıada oıyndarynda shpagamen semserlesýden el namysyn kimderdiń qorǵaıtynyn málimdedi. 

Atap aıtsaq, shpagamen semserlesýden jekeleı synda Elmır Alımjanov, Rýslan Kýrbanov jáne Vadım Sharlaımov synǵa túsedi. Jarys erejesi boıynsha, jekeleı synda árbir memleketten eń kóp degende úsh sportshy ǵana baq synaı alady. 

Al Erlik Sertaı jekeleı synǵa qatyspaıdy. Ol komandalyq jarysta ulttyq quramaǵa kómekke kelip, Parıj Olımpıadasynyń júldesine talaspaq. Komandalyq jarysta Elmır Alımjanov, Rýslan Kýrbanov, Vadım Sharlaımov jáne Erlik Sertaı synǵa túsedi. 

Olımpıada aldyndaǵy sońǵy jattyǵý jıynyn shpagashylar Ispanııada ótkizbek.

Aıta ketelik, shpagamen semserlesýden Qazaqstan erler komandasy álem kýbogi kezeńderiniń qorytyndysy boıynsha Olımpıada joldamasyn ıelendi.

Joǵaryda atalǵan tórttik jaqynda Kýveıtte ótken Azııa chempıonatynda top jaryp, álemdik reıtıngte tórtinshi orynǵa kóterilgen bolatyn.

Esterińizge sala keteıik, bıylǵy Frantsııa astanasy Parıjde ótetin HHHІІІ jazǵy Olımpıada oıyndary 26 shilde men 11 tamyz aralyǵynda ótedi.