Parıj-2024: Olımpıada júldegerleri Chempıondar saıabaǵynda marapattalady
ASTANA. KAZINFORM – Frantsııa astanasy Parıj qalasynda ótetin HHHІІІ jazǵy Olımpıada oıyndarynyń jeńimpazdary men júldegerlerin marapattaý rásimi ótetin arnaıy oryn belgili boldy.
PARIS2024 Kazakhstan telegram kanalynda atap ótkendeı, Eıfel munarasynyń etegindegi Trokaderoda ornalasqan Chempıondar saıabaǵy Olımpıada oıyndarynyń jeńimpazdary men júldegerleriniń jetistikterin atap ótýge arnalǵan aımaq bolmaq. Saıabaq álemniń túkpir-túkpirinen kelgen sport jankúıerleriniń kezdesý ornyna aınalmaq.
«Jazǵy oıyndar tarıhynda alǵash ret barlyq medal ıegeri myńdaǵan jankúıermen kezdesýge shaqyrylady Trokadero - Parıjdiń qaq ortasynda, barlyǵyna qol jetimdi keremet jer, Kún saıyn Chempıondar saıabaǵynda sol kúnniń jeńimpazdary qurmetke bólenedi. Olar sherýge qatysyp, jınalǵan kópshilikpen birge ashyq aspan astynda ózderiniń jeńisti sátterinen jınaqtalǵan beıne úzindilerdi tamashalaıdy», - delingen habarlamada.
Sonymen qatar, baǵdarlamada artısterdiń qoıylymdary men mádenı is-sharalar bar. Olar Chempıondar saıabaǵyn tek sport merekesiniń ornyna emes, oıyn-saýyq úshin tolyqqandy, ámbebap alańǵa aınaldyrmaq.
Esterińizge sala keteıik, qazirgi tańda tórtjyldyq dodaǵa joldama jeńip alǵan qazaqstandyq sportshylarymyz sońǵy oqý-jattyǵý jıyndaryn ótkizip jatyr. Qazaqstan quramasy Olımpıada oıyndaryna sporttyń 25 túrinen 80 joldama jeńip aldy. Naqtyraq aıtsaq, boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.
Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.
