Parıj-2024: Olımpıada aldyndaǵy álemdik reıtıngte qazaqstandyq sportshylar qaı orynda tur
ASTANA. KAZINFORM – Sanaýly kúnderden keıin, naqtyraq aıtsaq, 26 shilde kúni Frantsııa astanasy Parıjde XXXIII jazǵy Olımpıada oıyndardyń alaýy tutanady. Tórtjyldyq dodaǵa tórtkil dúnıe kóz tigetini anyq.
Qazir Olımpıada oıyndaryna Qazaqstan quramasy lıtsenzııalar sanyn 80-ge jetkizdi. Bul Parıj Olımpıadasy Qazaqstannyń táýelsiz el retinde qatysqaly otyrǵan segizinshi jazǵy Olımpıadasy bolmaq. Sondaı-aq Eýropa qurlyǵynda úshinshi ret (Afına, London, Parıj) baq synaıdy. Osy oraıda QR Ulttyq olımpıadalyq komıteti atap ótkendeı, qazirgi tańda Qazaqstan komandasy atalǵan basty dodaǵa sońǵy jattyǵý jıyndaryn ótkizip jatyr. Olımpıada qarsańynda otandastarymyzdyń álemdik reıtıngtegi orny da belgili boldy.
Álemdik reıtıng kóp jaǵdaıda jerebe tartý rásimine áser etedi jáne sportshynyń jarys aldyndaǵy deńgeıinen habar beredi. Ázirge, Qazaqstan komandasy sapynan álemdik reıtıngte birinshi orynda turǵan sportshy – Azamat Dáýletbekov. Erkin kúresten 86 keli salmaqta synǵa túsetin balýan birazdan beri tizgindi eshkimge bergen joq. Azamat – sońǵy álem chempıonatynyń qola júldegeri.
Olımpıadaǵa qatysatyn taǵy bir balýanymyz Álisher Erǵalı álemdik reıtıngte 8-orynda tur. Al Parıjge joldama alǵany kúni keshe belgili bolǵan Meırambek Qartbaı óz salmaǵynda tórtinshi orynda.
Grek-rım kúresinen 60 kelidegi Aıdos Sultanǵalı alǵashqy ondyqqa engen joq. 77 kelidegi Demeý Jadyraev UWW túzgen reıtıngte 7-satyǵa turaqtady. 87 kelidegi Nursultan Tursynov besinshi satyda.
Tennısten Qazaqstan komandasynyń úzdigi Elena Rybakına WTA reıtınginde 4-orynda keledi. Parıjde baq synaıtyn taǵy bir otandasymyz ıÝlııa Pýtıntseva álemniń 38-raketkasy sanalady.
Erler arasynda synǵa túsetin Aleksandr Býblık ATR reıtınginde 23-satyǵa ornalasty. Aleksandr Shevchenko álemdik reıtıngtiń 57-ornynda.
Dzıýdoshylar arasyndaǵy eń joǵarǵy reıtıng Ábıba Ábýjaqynovaǵa (48 keli) tıesili. Ol olımpıadalyq reıtıngte úzdik úshtikti tuıyqtap tur. Erler arasynda eń kóp upaı jınaǵan Abylaıhan Jubanazar (81 keli) onynshy satyǵa turaqtady. Eldos Smetov (60 keli) reıtıngte 22-orynda.
Semserlesýden álemdik reıtıng nátıjesi Olımpıada oıyndarynyń jerebe tartý rásimine tikeleı áser etedi. Komandalyq synda Qazaqstan quramasy álemdik reıtıngte 4-orynda.
Al jekeleı synda qazaqstandyq sportshylar arasynan Rýslan Kýrbanov joǵary ornalasqan. Ol 12-satyda. Erlik Sertaı 35, Elmır Alımjanov 47, Vadım Sharlaımov 65-orynda. Sondaı-aq, velosporttan Qazaqstan komandasy ótken maýsym qorytyndysy boıynsha UCI reıtınginde 19-oryn aldy.
Sporttyq gımnastıka ókili Narıman Kýrbanov álem kýbogi kezeńderinen soń qurylǵan reıtıngte 2-oryn ıelenip, Parıj Olımpıadasyna joldama alǵan bolatyn.
Esterińizge sala keteıik, Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.
