Parıj-2024: qytaılyq tennısshi álemniń 1-raketkasyn jeńip, sensatsııa jasady
PARIJ. KAZINFORM - Qytaılyq tennısshi, álemniń 7-raketkasy Chjen Tsınven sensatsııa jasap, Olımpıada oıyndarynyń fınalyna ótti.
Qytaılyq sportshy jartylaı fınalda álemniń birinshi raketkasy, altyn júldeden basty úmitker sanalǵan Polsha ókili Iga Shventekpen oınady.
Bir saǵat 50 mınýtqa sozylǵan tartysty matchta Tsınven 6:2, 7:5 esebimen jeńiske jetti. Ol 3 eıspen birge 13 breık-poınttyń altaýyn paıdalandy. Shventek 5 eıs, 3 breıkpen (6 breık-poınt) kózge tústi.
Qytaılyq tennısshi fınalda álemniń 21-raketkasy, horvatııalyq Donna Vekıch nemese reıtıngide 67-oryndaǵy slovakııalyq Anna-Karolına Shmıdlovanyń bireýimen altyn júldeni sarapqa salady.
Ch.Tsınven ótken jyly óz elinde ótken Azııa oıyndarynyń chempıony atanǵan bolatyn. Іzinshe Beıjiń jarysynda qazaqstandyq Elena Rybakınadan 1:6, 2:6 esebimen jeńilip qalǵan edi.
Tokıo Olımpıadasynda tórtinshi orynnan kóringen E.Rybakına bıyl Parıj dodasyna densaýlyǵyna baılanysty qatysýdan bas tartty.
Eske sala keteıik, budan buryn Elena Rybakınanyń kortqa jaqyn arada oralatyny týraly aıtqanyn jazǵan bolatynbyz.
