Parıj-2024: Qyrǵyz boksshysyna sekýndant bolǵan ózbekstandyq jattyqtyrýshy marapattaldy
PARIJ. KAZINFORM – Parıjdegi Olımpıada oıyndarynda qyrǵyz boksshysyna kómektesken ózbek bapkeri marapattaldy. Osy eńbegi úshin kórshi eldiń halyqaralyq qoǵamdyq birlestigi Akmal Hasanovty «Shyńǵys Aıtmatov» medalimen marapattady, dep habarlaıdy 24.kg.
«Shyńǵys Aıtmatov Ystyqkól forýmy» halyqaralyq qoǵamdyq birlestiginiń bas hatshysy Assol Moldokmatova ózbek bapkerin «adamgershiliktiń, toleranttylyqtyń jáne qoǵamdyq dıplomatııanyń joǵary deńgeıi úshin» marapattaý týraly sheshim 5 tamyzda qabyldanǵanyn habarlady.
– Adamgershiligi, baýyrmaldyǵy úshin Akmalǵa rahmet. Biz ony baǵalaımyz, qurmetteımiz. Sizdiń (Qyrǵyzstanǵa) kelýińizdi asyǵa kútemiz. Siz barlyq maqtaý men marapattarǵa laıyqsyz, – dedi ol.
Aıta keteıik, 4 tamyzǵa qaraǵan túni qyrǵyz boksshysy Mýnarbek Seııtbek Ýýlý Parıjde ótip jatqan jazǵy Olımpıada oıyndarynda amerıkalyq Harvı Djamalǵa qarsy shırek fınaldyq kezdesý ótkizip, jartylaı fınalǵa shyqqan bolatyn. Jekpe-jek barysynda oǵan Ózbekstan delegatsııasynan kelgen bapker Akmal Hasanov sekýndant boldy.
Jekpe-jekti Mýnarbektiń jeke bapkeri Beganas Sultanbaev ekrannan tamashalady. Jelilerde taraǵan aqparatqa qaraǵanda, Mýnarbektiń jeke jattyqtyrýshysy Beganas Sultanbaev akkredıtatsııa máselesine baılanysty Parıjge bara almaǵan.
