Parıj-2024: Qazaqstandyq boksshylardyń shırek fınaldaǵy qarsylastary anyqtaldy
ASTANA. KAZINFORM – Frantsııa astanasy Parıj qalasynda ótip jatqan Olımpıadada qazaqstandyq boksshylardyń shırek fınaldaǵy qarsylastary anyqtaldy.
Jarystyń atalǵan satysyndaǵy jekpe-jekter 1 jáne 2 tamyz kúnderine belgilengen. Onda Sáken Bıbosynov (51 keli), Muhammedsabyr Bazarbaıuly (63.5 keli), Nurbek Oralbaı (80 keli) jáne Aıbek Oralbaı (92 keli) el namysyn qorǵaıdy.
1 tamyzda Muhammedsabyr Bazarbaıuly 1/4 fınalda grýzııalyq Lasha Gýrýlımen qolǵap túıistiredi.
Lasha Gýrýlı - tájirıbeli boksshy, qazirge deıin 2021, 2023 jyldarda álem chempıonatynda 67 kelide qola júldeger atanǵan. Sondaı-aq 2022, 2024 jylda Eýropa chempıonatynda kúmis júldege qol jetkizdi.
Dál sol kúni Aıbek Oralbaı Ázerbaıjan quramasy atynan synǵa túsetin shyqqan tegi kýbalyq Loren Berto Alfonso Domıngespen sharshy alańǵa shyǵady. Ol 2020 jyly Tokıo Olımpıadasynda qola alsa, álem chempıonatynda 2021 jyly chempıon, 2023 jyly kúmis júldeger atandy.
Al 2 tamyzda Sáken Bıbosynov ózbekstandyq Hasanboı Dýsmatovpen kezdesedi. Ózbek boksshysy 2016 jyly Olımpıadada jeńis tuǵyryna kóterilse, álem chempıonatynda 2022 jyly altyn, 2018 jyly kúmis medal aldy.
Bul kúni 80 keli Nurbek Oralbaı ázerbaıjandyq Mýrad Allahverdıevpen sheberlik baıqasady. Atalǵan qarsylas ázirge joǵary jetistigimen eldi qýanta qoıǵan joq. Tek 2023 jyly Eýropa oıyndarynda qola medal alǵan.
Aıta ketsek, bokstan el quramasy sapynan Mahmud Sabyrhan (57 keli), Aslanbek Shymbergenov (71 keli) pen Qamshybek Qońqabaev (92 keliden joǵary) jarys jolyn erte aıaqtady.
