PARIJ-2024: Qazaqstan UOK alǵashqy iskerlik kezdesýin ótkizdi
ASTANA. QazAqparat – 6 aqpanda Frantsııanyń Parıj qalasynda ornalasqan Parıj-2024 Olımpıada oıyndaryn uıymdastyrý komıtetiniń shtab-páterinde Qazaqstan Respýblıkasy Ulttyq Olımpıada komıteti Olımpııa oıyndaryn uıymdastyrý komıtetiniń basshysy Tonı Estangemen jáne ókilderimen kezdesti, dep habarlaıdy QazAqparat UOK resmı saıtyna silteme jasap.
Kezdesý barysynda kelesi jyly 26 shilde men 11 tamyz aralyǵynda Frantsııanyń Parıj qalasynda ótetin XXXIII jazǵy Olımpıada oıyndaryna Qazaqstannyń qatysýy talqylandy. Sondaı-aq uıymdastyrý jumystary, onyń ishinde qatysýshylardy ornalastyrý jáne olarǵa arnalǵan kólik, sondaı-aq sportshylardyń jattyǵý jıyndary sóz boldy.
Tonı Estange Qazaqstan UOK-tiń Uıymdastyrý komıtetimen birlese áreket etýin joǵary baǵalap, seriktestigine alǵys aıtty. Qazaqstan UOK bas hatshysy Andreı Krıýkov Parıjdegi Olımpıada oıyndary eń erekshe oıyndardyń biri bolatynyn aıtty. Sondaı-aq ol Tokıo men Beıjińdegi Olımpıada kezinde bárimiz tap bolǵan qıyndyqtarǵa qaramastan, Parıj-2024-te bizdi túrli jańalyq kútip turǵanyn málimdep, Uıymdastyrý komıteti ujymyna alǵys bildirdi. Parıj-2024 Dırektorlar keńesiniń quramynda UOK músheleri Gı Drıý men Jan Krıstof Rollan, Parıj qalasynyń meri Anna Idalgo, prezıdent Brıdjıt Enrıkes pen Frantsııa UOK hatshysy Dıde Semıne, sondaı-aq basqa da úkimet organdary men sporttyq uıymdardyń ókilderi bar.
Foto: Julien Mattia/NurPhoto/Getty Images
