Parıj-2024: Qazaqstan quramasy Paralımpıadaǵa qansha joldama ıelendi
ASTANA. KAZINFORM – Olımpıada oıyndaryna daıyndyq shtaby Parıjde ótetin Paralımpıada oıyndaryna Qazaqstan quramasy qansha joldama jeńip alǵanyn aıtty.
«Osy ýaqytqa deıin paralımpıadashylar 11 lıtsenzııa jeńip aldy. Atap aıtsam, otyryp oınaıtyn voleıboldan erler quramasy, para jeńil atletıka boıynsha ıadro laqtyrý, para kanoe, para paýerlıftıng jáne para nysana kózdeý sporttarynan bir-bir joldama jeńip alsa, para júzý sporty men para taekvondodan úshten joldamaǵa qol jetkizdi», - dedi shtab basshysy Elsııar Qanaǵatov KAZINFORM tilshisiniń saýalyna bergen jaýabynda.
Sonymen qatar shtap basshysy qazirgi tańda ulttyq qurama sportshylarynyń aǵymdaǵy jaǵdaıy, delegatsııanyń josparly quramyn qaraý, qarjylandyrý men basqa aqparattyq uıymdastyrýshylyq daıyndyq máseleleri baqylaýda ekenin, jalpy de atap ótti.
«Qazirgi tańda paralımpıadaǵa deıin pysyqtaıtyn máseleler kóp. Degenmen atqarylyp jatqan daıyndyq jumystary da az emes. Para sportshylarymyzǵa laıyqty kóńil bólinip, jan-jaqty jaǵdaılar jasalýynda. Shtab para sportshylarǵa barynsha qoldaý kórsetip, uıymdastyrýshylyq jumystaryn jalǵastyrýda. Jalpy paralımpıada oıyndarynda Qazaqstan ulttyq quramasy sporttyń 9 túrinen - para jeńil atletıka, para paýerlıftıng, para taekvondo, para ústel tennısi, para júzý, para dzıýdo, para kanoe, otyryp oınaıtyn voleıbol, para nysana kózdeý óner kórsetýdi josparlap otyr», - dedi shtab basshysy.
Aıta ketsek, 17-shi jazǵy Paralımpıada bıyl 28 tamyz ben 8 qyrkúıek aralyǵynda Frantsııa astanasy Parıjde ótedi.
Jarysqa álemniń 184 elinen 4000 myńnan astam sportshy qatysyp, 22 sport túrinen 549 medal jıyntyǵy sarapqa salynady.
