Parıj-2024: HVII jazǵy Paralımpıda oıyndaryna 145 kún qaldy
ASTANA. KAZINFORM – Búgin Parıj-2024 Olımpıada jáne Paralımpıadaǵa daıyndyq shtaby Dene múmkindikteri shekteýli tulǵalarǵa arnalǵan sporttyq daıarlaý ortalyǵy men Ulttyq Paralımpıada komıtetiniń ókilderimen jıyn ótkizdi.
Kezdesýde ulttyq qurama sportshylarynyń qazirgi jaǵdaıy, delegatsııanyń josparly quramyn qaraý, qarjylandyrý men basqa aqparattyq uıymdastyrýshylyq daıyndyq máseleleri talqylandy.
«Qazirgi tańda Paralımpıada oıyndaryna deıin pysyqtaıtyn máseleler kóp. Degenmen atqarylyp jatqan daıyndyq jumystary da az emes. Parasportshylarymyzǵa laıyqty kóńil bólinip, jan-jaqty jaǵdaılar jasalyp jatyr. Shtab parasportshylarǵa barynsha qoldaý kórsetip, uıymdastyrýshylyq jumystaryn jalǵastyrýda», - dedi shtab basshysy Elsııar Qanaǵatov.
Aıta ketsek, HVII jazǵy Paralımpıada oıyndary bıyl 28 tamyz ben 8 qyrkúıek aralyǵynda Frantsııa astanasy Parıjde ótedi. Jarysqa álemniń 184 elinen 4 myńnan astam sportshy qatysyp, 22 sport túrinen 549 medal jıyntyǵy sarapqa salynady.
Qazaqstan ulttyq quramasy sporttyń 9 túrinen (para jeńil atletıka, para paýerlıftıng, para taekvondo, para ústel tennısi, para júzý, para dzıýdo, para kanoe, otyryp oınaıtyn voleıbol, para nysana kózdeý) óner kórsetýdi josparlap otyr.
Osy ýaqytqa deıin paralımpıadashylar 11 lıtsenzııa jeńip aldy: otyryp oınaıtyn voleıboldan erler quramasy – 1, para jeńil atletıka boıynsha ıadro laqtyrý – 1, para júzý – 3, para kanoe – 1, para paýerlıftıng – 1, para taekvondo – 3, para nysana kózdeý – 1.
