Dmıtrıı Panarınniń Olımpıadadaǵy qarsylastary anyqtaldy

PARIJ. ASTANA - Badmıntonnan Ulttyq qurama kóshbasshysy Dmıtrıı Panarın Parıj Olımpıadasynyń irikteýinde D tobyna tústi.

Sportty damytý dırektsııasynyń baspasóz qyzmeti atap ótkendeı, otandasymyz áýeli 28 shildede japon sportshysy Kenta Nısımotomen oınaıdy. Match Astana ýaqytymen 11:30-da bastalady. Kenta jerebe kezinde álem reıtınginde joǵary orynda turǵan 13 oıynshynyń qataryna kirgen. Osydan keıingi Panarınniń qarsylasy – kanadalyq badmıntonshy Braıan ıAng (oıynnyń kúni men ýaqyty keıin belgilenedi).

Dmıtrıı sporttyń bul túrinen barlyq sanattaǵy olımpııa oıyndarynda synǵa túsken tuńǵysh qazaqstandyqqa aınaldy. Ol osyǵan deıin 2018 jyly Argentına astanasy Býenos-Aıreste ótken jasóspirimder Olımpıadasynda synǵa túsken, sondaı-aq halyqaralyq deńgeıdegi Kazakhstan International (2018 jyly), Cyprus International (2021 jyly) týrnıriniń jeńimpazy. Al endi onyń qarsylastaryna toqtalaıyq:

Nısımoto – 2017 jylǵy jazǵy Ýnıversıadanyń kúmis júldegeri, Djakartadaǵy jazǵy Azııa oıyndarynyń (2018 jyl) qola júldegeri.

Braıan – Panamerıka oıyndarynyń jeńimpazy (2023 jyl) jáne kúmis júldegeri (2019 jyl), aralas komandalyq synda Býenos-Aıreste ótken jasóspirimder Olımpıadasynyń chempıony.

Badmıntonnan barlyq oıyn 27 shilde men 5 tamyz aralyǵynda Parıjdegi Port-de-la-Shapel arenada (taǵy bir ataýy «Adıdas Arena») ótedi. Bul joly 36 memleketten 41 sportshy júldege talasady. Olar 3-4 atletten 13 topqa bólingen. Pleı-off kezeńine tek 1-oryn alǵan oıynshy shyǵady. D tobynyń úzdigi 1/16 aınalymda S tobynyń myqtysymen kezdesedi. Al bul juptyń jeńimpazyn shırek fınalda A tobynyń myqtysy kútip tur.