«Paryz» Gran-prıi: «Qazaqmys» – Qazaqstandaǵy áleýmettik jaýapkershilik kóshbasshysy
ASTANA. KAZINFORM – Qazaqstanda korporatıvtik áleýmettik jaýapkershiliktiń kóshbasshysy atanǵan «Qazaqmys» korporatsııasy ulttyq deńgeıde tanyldy. Bul mártebeli marapat kompanııanyń óńirler men qyzmetkerlerdi qoldaýdaǵy júıeli jáne aýqymdy jumysynyń kórinisi bolyp otyr.
Astanada ótken respýblıkalyq bıznestiń áleýmettik jaýapkershiligi jónindegi «Paryz» konkýrsynyń jeńimpazdaryn marapattaý rásiminde iri kásipkerlik sýbektileri arasyndaǵy basty syılyq – Gran-prı – Ulytaý oblysyndaǵy «Qazaqmys Korporatsııasy» JShS kompanııasyna berildi. Marapatty Prezıdent Qasym-Jomart Toqaev tapsyrdy.
Marapat kompanııanyń óńirlerdegi ómir sapasyn arttyrýǵa baǵyttalǵan aýqymdy jumysyn moıyndaý bolyp tabylady. Tek 2025 jyly «Qazaqmys» aımaqtardy damytýǵa jáne jeke qoldaýǵa 90 mlrd teńgeden astam qarajat bóldi. Bul qarajat turǵyn úımen qamtamasyz etý, densaýlyq saqtaý men ınfraqurylymdy damytý, bilim berý jáne sporttyq múmkindikterdi jaqsartý, sondaı-aq qyzmetkerlerge áleýmettik kepildikterdi keńeıtý sekildi negizgi baǵyttardy qamtydy.
Osy jyly korporatsııa aýqymdy áleýmettik jáne ınfraqurylymdyq jobalardy júzege asyrdy. Sátbaev qalasynda 320 oryndyq balabaqsha (~0,95 mlrd tg) ashyldy, 0,5 ga qoǵamdyq keńistik abattandyryldy (~0,9 mlrd tg). Jezqazǵanda 8000 m² sport kesheni (~8,5 mlrd tg), 900 balaǵa arnalǵan shahmat akademııasy (~0,6 mlrd tg), TJM qajettilikterine arnalǵan elimizdegi alǵashqy avıatsııalyq angar (~0,6 mlrd tg), sondaı-aq geologııalyq klaster men oqý ortalyǵy (~11 mlrd tg) iske qosyldy. Jyl sońyna deıin 4000 m² jańa sport kesheni, kúres akademııasy jáne 200 oryndyq jataqhana ashylady (~5,3 mlrd tg, ashylý kúni – 24.12.25).
UMC-pen birlesip Ulytaý oblysynda alǵash ret joǵary tehnologııalyq operatsııalar – aortokoronarly shýnttaý jáne kardıoverter-defıbrıllıator ımplantatsııasy (~0,65 mlrd tg) sátti júzege asyryldy. Sonymen qatar, korporatsııa respýblıkalyq voleıbol, fýtbol, ústel tennısi, regbı jáne basqa sport federatsııalaryn qoldady.
Qyzmetkerler men olardyń otbasylaryna sapaly medıtsınalyq kómekke qoljetimdilikti arttyrý úshin erikti medıtsınalyq saqtandyrý baǵdarlamasy keńeıtildi. Turǵyn úı kómegi kúsheıtilip, 60-tan astam otbasy jańa qyzmettik páterlerge ıe boldy. Áleýmettik tólemder kóbeıtilip, qosymsha kepildikter men qoldaý baǵdarlamalary engizildi, jańartylǵan ujymdyq kelisimshartqa qol qoıyldy.
Kompanııa ishinde jyldyq eńbek aqy qoryn ınflıatsııa deńgeıinde birjolǵy ındeksatsııalaý engizilip, barlyq qyzmetkerler úshin toqsan saıyn 50 AEK kóleminde syıaqy belgilendi. Stomatologııalyq kabınetter ashylyp, korporatıvtik damý baǵdarlamalary keńeıtildi. Jyl saıynǵy eńbek jarystary uıymdastyrylyp, keńeıtilgen erikti medıtsınalyq saqtandyrý baǵdarlamasy 140 myńnan astam qyzmetker men olardyń otbasy múshelerin qamtydy.
«Qazaqmys» bilim berý, sport, mádenıet jáne ınfraqurylymdyq nysandardy damytýǵa ınvestıtsııa salýdy jalǵastyryp, óńirlerde ómir súrý jáne kásibı ósý úshin zamanaýı jaǵdaılar qalyptastyrylyp jatyr.
- Qyzmetkerlerimizge, olardyń otbasylaryna jáne árbir óńir turǵynyna qamqorlyq kórsetý – bizdiń basty qaǵıdatymyz. Árbir áleýmettik joba – adamdarǵa jáne aımaqtardyń bolashaǵyna salynǵan ınvestıtsııa. Bul marapat – árbir qyzmetkerimizdiń jáne óńirdiń árbir turǵynynyń eńbeginiń nátıjesi. Barlyq ujymǵa adal eńbegi, bastamashyldyǵy jáne kásibine berik bolǵany úshin shyn júrekten alǵys aıtamyn, - dep atap ótti «Qazaqmys Korporatsııasy» Basqarma tóraǵasy Nurahmet Núrıev.
Sonymen qatar, «Altyn sapa» konkýrsynda kolledjder jáne tálimgerlermen birlesip jumys isteıtin kásiporyndar jáne jumys mamandyqtaryn nasıhattaýǵa baǵyttalǵan jobalar joǵary baǵalandy. Korporatsııanyń áleýmettik jaýapkershilikke berilgen joǵary baǵasy top kásiporyndarynyń basqa jetistikterimen úılesip, júıelilik, sapa jáne adam kapıtalyn damytý «Qazaqmys» korporatıvtik mádenıetiniń ajyramas bóligi ekenin kórsetti.
Holdıng quramyndaǵy Qaraǵandy quıý-mashına jasaý zaýyty (KLMZ) «Kásibı maman» konkýrsynda birden eki nomınatsııada tanyldy. Aımaqtyq kezeń qorytyndysy boıynsha TOO «MAKER» «Úzdik kásiporyn» nomınatsııasynda III oryn aldy, al metall konstrýktsııalaryn jınaý 6 razrıadty sheberi Aleksandr Isýpov «Úzdik tálimger» sanatynda III orynǵa ıe boldy.
Tehnologııalyq seriktestik te erekshe atalyp ótti: AG Tech kompanııasy DMMS sandyq ónimin jasap, ony «Qazaqmys» kásiporyndarynda engizgeni úshin «Altyn Sapa» syılyǵyn aldy. Bul óndiristik protsesterdiń tıimdiligin edáýir arttyrdy.
«Paryz-2025» syılyǵy kompanııanyń óńirlerdiń turaqty damýyna jáne áleýmettik turaqtylyqqa qosqan eleýli úlesin rastaıdy. «Qazaqmys» úshin bul áleýmettik baǵdarlamalardy kúsheıtý jáne aımaqtardy qoldaýdy keńeıtý jolyndaǵy qosymsha ynta bolyp tabylady.