«Paryz» baıqaýy: Astanada bıznestiń áleýmettik jaýapkershiligi artady

ASTANA. KAZINFORM — Elordada bıznestiń áleýmettik jaýapkershiligi jóninde «Paryz» baıqaýy bastaldy, dep habarlaıdy qala ákimdiginiń baspasóz qyzmeti.

Ákimdik málim etkendeı, ol halyqtyń ál-aýqatyn odan ári jaqsartý úshin qoǵam aldyndaǵy ózderiniń korporatıvtik áleýmettik jaýapkershiligin qalyptastyrýǵa jáne arttyrýǵa baǵyttalǵan.

Baıqaý tórt nomınatsııa boıynsha ótedi:

1) «Úzdik áleýmettik jaýapty kásiporyn». Bul nomınatsııada óz personalyn qoldaýǵa, múmkindigi shekteýli adamdardy áleýmettik beıimdeýge jáne jalpy koǵamnyń ál-aýqatyn jaqsartýǵa baǵyttalǵan áleýmettik baǵdarlamalardy (eńbekaqyny jáne áleýmettik tólemderdi tóleýdi, kadrlardy kásiptik daıarlaý men qaıta daıarlaý júıesin uıymdastyrý, múmkindigi shekteýli adamdardy barynsha kóp mólsherde jumysqa ornalastyrý jáne t. b.) iske asyratyn úmitkerlerdiń kyzmeti qaralady;

2) «Eńbekti qorǵaý salasyndaǵy úzdik kásiporyn». Bul nomınatsııada eńbek kyzmeti protsesinde qyzmetkerlerdiń densaýlyǵyn saqtaýǵa múmkindik beretin eńbek jaǵdaılaryn jasaıtyn úmitkerlerdiń qyzmeti qaralady;

3) «Úzdik ujymdyq shart». Bul nomınatsııada Qazaqstan Respýblıkasynyń zańnamasynda kózdelgen, qyzmetkerlerdiń eńbek jáne áleýmettik quqyqtaryn edáýir jaqsartatyn jáne nyǵaıtatyn ujymdyq sharttar qaralady;

4) «Ekologııaǵa qosqan úlesi úshin». Bul nomınatsııada qorshaǵan ortanyń, qaldyqtardy kádege jaratý men qaıta óńdeýdiń jaı-kúıin jaqsartýǵa baǵyttalǵan tabıǵatty qorǵaý (ekologııalyq) baǵdarlamalaryn, is-sharalaryn jáne jobalaryn iske asyrýda erekshe kózge túsken úmitkerlerdiń qyzmeti qaralady.

Ótinimderdi qabyldaý 2025 jyldyń 1 shildesine deıin júrgiziledi.

— Baıqaýǵa qatysý tegin. Úmitkerler óz materıaldaryn qaǵaz túrinde jáne elektrondy formatta joldaıdy. Baıqaý jóninde tolyq aqparatty 55-68-05, 55-68-34, 55-68-11 (Astana qalasynyń Jumyspen qamtý jáne áleýmettik qorǵaý basqarmasy), 57-49-38, 57-49-35, 57-49-36 (Memlekettik eńbek ınspektsııasy Komıtetiniń Astana qalasy boıynsha departamenti), 55-75-74, 55-75-81 (Astana qalasynyń Qorshaǵan ortany qorǵaý jáne tabıǵatty paıdalaný basqarmasy) telefondary arqyly alýǵa bolady. Mekenjaıymyz: Astana qalasy, Beıbitshilik kóshesi, 9, 2 qabat, 220 kabınet, el.poshta: [e-mail]. [e-mail], — delingen habarlamada.

Osyǵan deıin eń joǵarǵy jyldyq ınflıatsııa Astana qalasynda tirkelgeni belgili boldy.