«Paryz-2026»: úzdik áleýmettik jobalar men kásiporyndardy anyqtaıtyn baıqaý bastaldy
ASTANA. KAZINFORM — Astanada bıznestiń áleýmettik jaýapkershiligi boıynsha «Paryz» baıqaýy bastaldy. Joba jekemenshik kásipkerlik sýbektileriniń qoǵam aldyndaǵy korporatıvtik áleýmettik jaýapkershiligin qalyptastyrýǵa jáne arttyrýǵa, sondaı-aq halyqtyń ál-aýqatyn jaqsartýǵa baǵyttalǵan. Bul týraly Astana qalasynyń ákimdigi málim etti.
Baıqaý tórt nomınatsııa boıynsha ótkiziledi:
- «Úzdik áleýmettik jaýapty kásiporyn». Bul nomınatsııada óz qyzmetkerlerin qoldaýǵa, múmkindigi shekteýli adamdardyń áleýmettik beıimdelýine jáne jalpy qoǵamnyń ál-aýqatyn jaqsartýǵa baǵyttalǵan áleýmettik baǵdarlamalardy júzege asyratyn úmitkerlerdiń qyzmeti qarastyrylady (eńbekaqy tóleý jáne áleýmettik tólemderdi uıymdastyrý, kadrlardy kásibı daıarlaý jáne qaıta daıarlaý júıeleri, múmkindigi shekteýli adamdardy jumyspen qamtý jáne t.b.).
- «Eńbekti qorǵaý salasyndaǵy úzdik kásiporyn». Bul nomınatsııada qyzmetkerlerdiń eńbek qyzmeti barysynda densaýlyǵyn saqtaýǵa múmkindik beretin eńbek jaǵdaılaryn qalyptastyratyn úmitkerlerdiń qyzmeti baǵalanady.
- «Úzdik ujymdyq shart». Bul nomınatsııada Qazaqstan Respýblıkasynyń zańnamasynda kózdelgen qyzmetkerlerdiń eńbek jáne áleýmettik quqyqtaryn edáýir jaqsartatyn ári nyǵaıtatyn ujymdyq sharttar qarastyrylady.
- «Ekologııaǵa qosqan úlesi úshin». Bul nomınatsııada qorshaǵan ortanyń jaǵdaıyn jaqsartýǵa, qaldyqtardy qaıta óńdeý men kádege jaratýǵa baǵyttalǵan tabıǵatty qorǵaý (ekologııalyq) baǵdarlamalaryn, is-sharalar men jobalardy júzege asyrýda erekshe kózge túsken úmitkerlerdiń qyzmeti baǵalanady.
Baıqaý aıasynda «Jyldyń úzdik áleýmettik jobasy» arnaıy syılyǵy da qarastyrylǵan.
Baıqaýǵa qatysýǵa ótinimder 1 shildege deıin qabyldanady.
Qatysýshylardyń qujattary hr.enbek.kz portaly arqyly («Paryz» nomınatsııasy) nemese qaǵaz jáne elektrondyq nusqada Beıbitshilik kóshesi, 9, 220-kabınet mekenjaıynda qabyldanady.
Baıqaý týraly tolyq aqparatty myna telefon nómirleri arqyly alýǵa bolady:
Astana qalasynyń Jumyspen qamtý jáne áleýmettik qorǵaý basqarmasy: 55-68-34, 55-68-05, 55-68-11;
Astana qalasy boıynsha Memlekettik eńbek ınspektsııasy komıteti departamenti: 57-49-38, 57-49-35, 57-49-36;
Astana qalasynyń Qorshaǵan ortany qorǵaý jáne tabıǵatty paıdalaný basqarmasy: 55-75-74, 55-75-81.
Buǵan deıin «Qyzyl Book Art: Dala qazynasy» respýblıkalyq sýret baıqaýyna ótinim qabyldaý bastalǵanyn jazdyq.
